Azərbaycan bank sektorunun liberallaşdırılması siyasətini yürüdür və bu gün bank sistemi bazel standartlarına uyğundur. Azərbaycan Milli Bankının baş direktoru Rüfət Aslanlının bildirdiyi kimi, xarici bank filiallarının açılışına qoyulan məhdudiyyətlər həmin bankların yerləşdiyi ölkələrin "çirkli pullar"ı yumaqda və terrorçuluğu maliyyələşdirməkdə ifşa olunması ilə bağlıdır.
"Belə ölkələrin sayı 7 idi, indi cəmi biri qalıb" -deyə R.Aslanlı vurğulayıb.
Lakin AMB Ümumdünya Ticarət Təşkilatı ölkələrinin xarici bankların milli qanunvericilik deyil, baş bankın qaydalarına əsasən fəaliyyət göstərəcək birbaşa filiallarının açılışına icazə vermək haqqında təkliflərinə münasibətdə radikal mövqe tutub.
"Bunu ABŞ və Avropa Birliyi tələb edir. Onlar istəyir ki, biz baş bankın prosedurlarına üuyğun fəaliyyət göstərəcək birbaşa filialların açılması mümkünlüyü ilə bağlı öhdəlik götürək. Lakin bu ÜTT-nin tələbi deyil və buna görə biz bu təklifləri qəbul etməyə bilərik, lakin bununla yanaşı güzəştə getməliyik" - deyə o əlavə edib.
Bundan başqa, Azərbaycanda birbaşa filialların açılışı ilə bağlı məhdudiyyət yoxdur. Bu gün ölkədə "Melli İran Bank" və Pakistan Milli Bankının birbaşa filialları fəaliyyət göstərir. Onun sözlərinə görə, məhdudiyyət yalnız aktivlərə aiddir. AMB xarici bank filiallarının aktvləri AMB-nın mühafizəkar qaydalarına uyğun təsnif edilməsini tələb edir. "Mühafizəkar yanaşma 4 ildir ki əməkdaşlıq etdiyimiz DB və USAID-in tövsiyələri əsasında seçilib. Bu gün Azərbaycanın reytinqı ABŞ və AB-nın reytinqindən aşağıdır. Buna görə biz bankların aktivlərinə daha mühafizəkar tələblər qoymalıyıq" - deyə R.Aslanlı bildirib. Lakin bu il ölkənin suveren reytinqının artırılması gözlənilir. Bundan sonra bank aktivlərinə mühafizəkar yanaşmaya ehtiyac qalmayacaq. Lakin bunun üçün vaxt lazımdır.
Xarici banklar qarşısında qoyulan daha bir tələb onların kapitalı ilə bağlıdır. Azərbaycanda filial açarkən onlar ölkədə fəaliyyət göstərən bankların səhmdar kapitalına bərabər müəyyən məbləği təxsis etməlidir.
R.Aslanlı Azərbaycanda xarici banklara münasibətdə proteksionist siyasətin yürüdüldüyü fikrilə də razı deyil. Bir neçə il əvvəl Milli Bank xarici bankların Azərbaycana dəvət edilməsi barədə məlumatı "Financial Times"da yerləşdirmişdi. Bu gün ölkədə xarici kapitala malik 18 bank fəaliyyət göstərir.
