"Azəriqazbank" ilə Asiya İnkişaf Bankı (AİB) arasında kredit müqaviləsinin imzalanması gələn həftə Bakıda olacaq. Bank idarə heyətinin sədri Azər Mövsümov Trend ə bildirib ki, AİB kiçik və orta sahibkarlığın maliyyələşdirilməsi çərçivəsində 4 mln. dollar kredit ayırmağa hazırdır. Kredit 3 il müddətinə təqdim ediləcək. A.Mövsümovun sözlərinə görə, kredit xətti vəsaitlərindən layihələrin maliyyəlşdirilməsi məbləğində məhdudiyyət yoxdur, ona görə bir layihə üçün minimum və maksimum məbləğ müəyyən edilməyib.
Bu kredit xətti üzrə bir müqavilə 2006-cı ilin dekabr ayında imzalanıb, lakin A.Mövsümov qeyd edib ki, həmin razılaşmanın leqallaşdırılması üçün AİB-nin prosedurları daha bir sənədin imzalanmasını tələb edir. Bu prosedur AİB tərəfindən imzalanma üçün etibarnamə alındıqdan sonra baş tutacaq.
Bu, AİB-nin "Azəriqazbank" üçün ikinci kredit xətti olacaq. Birinci keçən ilin yayında ayrılıb. Azərbaycan bankına ticarət maliyyələşməsi üçün 3,5 mln. və 0,5 mln. dollar revolver kredit ayrılıb.
