Bank Respublikanın səhmdarları Beynəlxalq Maliyyə Korporasiyası ilə Azərbaycan bankının kapitalında aksiya paketinin əldə olunması barədə danışıqları davam etdirirlər. Bankın idarə sədri Xədicə Həsənovanın Trend ə verdiyi xəbərə görə, BMK-a veriləcək aksiya paketi hələ təyin olunmayıb.
"Maliyyə korporasiyası öz qərarı ilə bankın aksioneri kimi çıxış etməyə hazır olduğunu bildirib, lakin iştirak payı məsələsi səhmdarlar tərəfindən - SİDT, DEG və Quliyevlər ailəsi - qərarlaşacaq. Bu məsələnin hüquqi cəhətdən vacibliyini nəzərə alsaq, o, 2006-cı ilin yekunlarının auditindən sonra baş tutacaq"-deyə X. Həsənova qeyd edib. Auditor hesabatı beynəlxalq auditor Şirkəti Deloitte tərəfindən hazırlanır.
O, həmçinin BMK ilə sazişin imzalanma vaxtını proqnozlaşdırmaqdan da imtina edib. BMK-nın direktorlar şurası Bank Respublikanın kapitalına 4,5 mln dollar investisiya yatırmaq barədə qərara gəlib. Bununla yanaşı BMK əsas borcu 2 illik ödəmə möhləti olan 5 illik müddətlə 1,5 mln. dollar kredit xətti açıb. X. Həsənovanın sözlərinə görə, kredit xəttinə əsasən, sazişin imzalanması rüb ərzində gözlənilir. Kredit resursları Azərbaycanda orta və xırda sahibkarlığın inkişafı üçün nəzərdə tutulub.
Bank Respublikanın kapitalında artıq xarici iştiraklar var. Bu gün bankın 25%-i və 1 aksiyası Sparkassen International Development Trust (SIDT, Sparkassen-Finanzgruppe üzvü) və Deutsche Entwicklungsgesellschaft-a (DEG, KfW banking group-un üzvü) məxsusdur.