Böyük Britaniya, London, 11 mart / Trend , müxbir N.İsmayılova/
Azərbaycan qarşıdakı illərdə Avropa İttifaqı və region ölkələrinin enerji təhlükəsizliyinin təmin olunmasında rolunu artıracaq. Bu barədə 2010-cu il martın 8-də Londonda keçirilən "Böyük Britaniya Azərbaycanda" ticarət-investisya forumu çərçivəsində çıxış edən ARDNŞ-nin iqtisadi məsələlər üzrə vitse-prezidenti Süleyman Qasımov bildirib. Forum Yaxın Şərq Assosiyasiyasının (Middle East Association) və Azərbaycan Beynəlxaq Bankının dəstəyi ilə təşkil olunub.
"Məqsədimiz 2015-ci ilə kimi ölkədə neft hasilatını 60 milyon tona, qaz hasilatını isə 35-40 milyon kubmetrə çatdırmaqdır. Biz Aİ və region ölkələrində enerji təhlükəsizliyinin təmin olunmasında ölkəmizin qarşıdakı illərdə rolunun artacağına inanırıq", - Qasımov deyiib.
Onun sözlərinə görə, ötən il Azərbaycanda 50 milyon tondan çox neft hasil edilib ki, bu da 2008-ci ildəki göstəricidən altı milyon ton çoxdur. 2009-cu ildə 24 milyard kubmetr qaz istehsal olunub ki, bu da ötən ilin göstəricisindən 276 milyon kubmetr çoxdur.
"Bütün bunlar proqnozların həyata keçirilməsi üçün şərait yaradır", - Qasımov bildirib.
Onun sözlərinə görə, qaz istehsalının artırılması qarşıya qoyulan məqsədlərdən biridir. "Şahdəniz" yatağında işlərin genişləndirilməsi, "Ümid" və "Abşeron" strukturlarının istismara verilməsi, həmçinin, digər yataqlardakı işlər hesabına Azərbaycan bu vəzifəni müvəffəqiyyətlə yerinə yetirəcək.
Qasımov deyib ki, ölkədə sutkada bir milyon barel neft və 65 milyon kubmetr qaz istehsal olunur.
"Hazırda Azərbaycanın neft və neft məhsulları dünyanın 30 ölkəsinə, həmçinin, Çin, ABŞ, Almaniya, İspaniya, Böyük Britaniya və İtaliyaya ixrac olunur. Son zamanlar bu siyahıya Hindistan, Cənubi Koreya, Çili və digər ölkələr də əlavə olunub", - Qasımov qeyd edib.
Onun sözlərinə görə, Xəzər dənizi hövzəsində təxminən 30 milyard ton neft və 18-20 trilyon ton kubmetr qaz ehtiyatı mövcuddur ki, bu da dünyanın 15 faiz karbohidrogen ehtiyatını təşkil edir. Xəzər dənizinin Azərbaycana aid olan ərazisində 3-5 milyard ton neft və 5 trilyon kubmetr qaz mövcuddur.