Azərbaycan, Bakı, 12 noyabr /Trend, müxbir E.İsmayılov/
Hazırda Xəzərin Azərbaycan sektorunda "Azəri-Çıraq-Günəşli" (AÇG) blokunun işlənməsi üzrə tərəfdaşlar sutkada 35 milyon kubmetr səmt qaz hasil edirlər. Bu barədə cümə günü neft-qaz bazarındakı mənbə deyib.
Bloka səmt qazı neft hasil edilən zaman daxil olur. Onun böyük hissəsi hasilat səviyyəsini saxlamaq üçün laylara, bir hissəsi isə pulsuz ARDNŞ-ə verilir.
"İndi "Azəri-Çıraq-Günəşli" yatağından sutkada 35 milyon kubmetr qaz hasil edilir", - mənbə qeyd edib.
2010-cu ildə ümumilikdə BP AÇG layihəsi çərçivəsində ARDNŞ-ə 1,9 milyard kubmetr səmt qazı verməyi planlaşdırır. Bu barədə BP-nin rəsmi hesabatında deyilir. Lakin, Azərbaycanın neft-qaz bazarı iştirakçılarının qiymətləndirmələrinə görə, bu göstərici ən azı iki dəfə artırılacaq.
2009-cu ildə ARDNŞ-ə planlaşdırılan 1,45 milyard kubmetr əvəzinə 4 milyard kubmetrə yaxın qaz verilib.
"Azəri-Çıraq-Günəşli" yatağının işlənməsi üzrə layihənin iştirakçıları BP (operator, 37,43 faiz iştirak payı), Chevron (11,27 faiz), ARDNŞ (10 faiz), INPEX (10,96 faiz), Statoil (8,56 faiz), Exxon (8 faiz), TPAO (6,75 faiz), Itochu (4,3 faiz), Hess şirkətidir (2,72 faiz).