Azərbaycan, Bakı, 29 mart /Trend, müxbir E.İsmayılov/
Hazırda Xəzərin Azərbaycan sektorundakı "Şahdəniz" qaz-kondensat yatağında sutkalıq hasilat 18 milyon kubmetrə yaxındır. Bu barədə çərşənbə axşamı Trend-ə neft-qaz bazarındakı mənbə deyib.
Onun sözlərinə görə, yataqda hasil edilən qazın ümumi həcminin 15-16 milyon kubmetri müqavilə çərçivəsində Türkiyəyə, qazın qalan hissəsi isə Azərbaycan və Gürcüstana tədarük edilir.
2010-cu ildə Azərbaycanın "Şahdəniz" qaz-kondensat yatağından 6,9 milyard kubmetrə yaxın qaz və 1,9 milyon ton (14,7 milyon barel) kondensat hasil olunub. Ötən il yataqda orta sutkalıq hasilat 19 milyon kubmetr qaz təşkil edib.
"Şahdəniz" yatağının işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə 25 milyard kubmetrədək çatdırmaq mümkün olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.