Bakı. Trend:
Bakıda Azərbaycan- Mərkəzi Asiya Yaşıl Enerji Həftəsinin (Azerbaijan & Central Asia Green Energy Week 2025) ikinci günü keçirilir.
Trend xəbər verir ki, tədbirdə Azərbaycan Respublikasının Energetika Nazirliyi yanında Bərpa Olunan Enerji Mənbələri Agentliyinin direktor müavini Rəna Hümbətova, Gürcüstanın İqtisadiyyat və Dayanıqlı İnkişaf Nazirliyinin Enerji Səmərəliliyi və Bərpa Olunan Enerji Mənbələri Departamentinin rəhbər müavini Omar Sereteli, IFC-nin (Beynəlxalq Maliyyə Korporasiyası) Avropa və Cənubi Qafqaz üzrə infrastruktur üzrə investisiya meneceri Vyaçeslav Qordiyenko, eləcə də enerji şirkətlərinin digər nümayəndələri çıxış edəcəklər.
Tədbir çərçivəsində Azərbaycanda hidrogen energetikasının inkişaf perspektivləri, külək enerjisinin inkişafı: turbin istehsalçılarının innovativ həlləri, IFC-nin tərəfdaş olaraq oynadığı rol ( layihənin yaradılmasından tutmuş uzunmüddətli maliyyələşməyə qədər) kimi məsələlər müzakirə olunacaq.
Energetika Nazirliyi yanında Bərpa Olunan Enerji Mənbələri Dövlət Agentliyinin direktor müavini Rəna Hümbətova çıxış edərək bildirib ki, hazırda Avropa Yenidənqurma və İnkişaf Bankının (AYİB) dəstəyi ilə hidrogen enerjisi istehsalı üzrə yeni mərhələyə başlayırıq.
Onun sözlərinə görə, bir ay ərzində məsləhətçi şirkət seçiləcək:
"Artıq tender bağlanıb və 13 şirkət AYİB-ə təklif təqdim edib. Hökumət də bu prosesin qiymətləndirilməsində iştirak edir. Məsləhətçi strategiyanın icra planında iştirak edəcək. Bu plan isə tənzimləmə, torpaqdan istifadə, bərpa olunan enerji mənbələrinin bölgüsü və digər vacib məsələləri əhatə edəcək.
Məsələn, yaşıl hidrogen istehsalında bərpa olunan enerji
mənbələrinin birbaşa qoşulması tələb olunur. Bu, sertifikatlaşdırma
üçün vacibdir. Bu qərar bizdən asılı olmayıb, amma qaydalara uyğun
hərəkət etməliyik.
Hidrogen Azərbaycanda hələ də çox perspektivli sahədir. Lakin
düzgün yanaşma və tərəfdaşlıq burada həlledici olacaq".
Gürcüstan İqtisadiyyat və Davamlı İnkişaf Nazirliyinin Enerji səmərəliliyi və bərpa olunan enerji mənbələri departamentinin rəhbər müavini Omar Sereteli isə qeyd edib ki, Gürcüstan və Azərbaycan “yaşıl” hidrogenin tədarükü və tranziti üzrə ideya və mexanizmlər hazırlayırlar.
“Gürcüstanın qonşu ölkələrlə əməkdaşlığı “yaşıl energetika dəhlizi” layihələri çərçivəsində yaşıl hidrogenin Avropaya tədarükü, tranziti və ixracına dair ideyaların işlənib hazırlanmasına yönəlib”, - deyə o qeyd edib.
Onun sözlərinə görə, bəzi layihələr obyektiv səbəblərdən müvəqqəti olaraq təxirə salınsa da, bu istiqamətdə iş davam etdirilir.
“Azərbaycanla birgə bizdə “Yaşıl enerji dəhlizi” adlı təşəbbüs var. Onun çərçivəsində biz “yaşıl” hidrogenin həm boru kəmərləri, həm də dəniz yolu ilə Rumıniyaya və oradan Avropaya tədarükü və tranziti üzrə ideya və mexanizmlər hazırlayırıq. Artıq bir sıra mümkün marşrutlar müəyyən etmişik və onların bir hissəsi kifayət qədər real görünür”, - deyə Sereteli vurğulayıb.
Xəbər yenilənəcək
