Bakı.Trend:
Azərbaycan bərpa olunan enerji sektorunu, xüsusən də günəş və külək enerjisini əhəmiyyətli dərəcədə genişləndirir, eyni zamanda yaşıl hidrogen, onun törəmələri və geotermal enerji kimi yeni sahələri araşdırır.
Trend-in tədbirdəki müxbiri xəbər verir ki, bu barədə Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsi çərçivəsində keçirilən “Bakıdan COP31-ə: Parçalanmış dinamikanı qoruyub saxlamaq” adlı panel müzakirəsi zamanı çıxışında deyib.
O qeyd edib ki, qlobal enerji keçidi yeni bir mərhələyə qədəm qoyur. Bu gün qarşıda duran çağırış artıq sadəcə olaraq daha çox bərpa olunan enerji gücü tətbiq etmək deyil.
“Bərpa olunan enerjinin iqtisadiyyatlarımıza, sosial və sənaye transformasiyamıza səmərəli inteqrasiya olunmasını, investisiyaları cəlb etməsini və enerji təhlükəsizliyini möhkəmləndirməsini təmin etməliyik.
Bu, innovasiya tələb edir. Bu, rəqəmsallaşma tələb edir və getdikcə daha çox sərhədlərarası əməkdaşlıq tələb edir. Azərbaycan bərpa olunan enerji sektorunu, xüsusən də günəş və külək enerjisini əhəmiyyətli dərəcədə genişləndirir, eyni zamanda yaşıl hidrogen, onun törəmələri və geotermal enerji kimi yeni sahələri araşdırır”,- deyə o əlavə edib.
C.Abdullayev bildirib ki, məqsədimiz yalnız daxili enerji sistemimizdə bərpa olunan enerjinin payını artırmaq deyil, həm də yeni yaşıl sənaye sahələrini inkişaf etdirmək və Azərbaycanı yaşıl enerji üzrə mühüm regional mərkəzə çevirməkdir.
“İnnovasiya bu məqsədə çatmaq üçün mühüm təməl nöqtəsidir. Əsas sahələrimizdən biri hidrogendir. Biz həmçinin geotermal enerjinin potensialını araşdırırıq. Buna mərkəzləşdirilmiş istilik təchizatı, elektrik enerjisi istehsalı və istixanaların qızdırılması, o cümlədən mövcud infrastrukturdan innovativ istifadə imkanları daxildir. Lakin bu gün innovasiyanı rəqəmsal transformasiyadan ayrı təsəvvür etmək olmaz. Bu kontekstdə Azərbaycan rəqəmsal xəritəçəkmə, inteqrasiya olunmuş məlumat bazaları və analitik alətlər vasitəsilə bərpa olunan enerji informasiya sistemini inkişaf etdirir”,- deyə o vurğulayıb.
Qeyd edək ki, 11 sentyabradək Bakıda Azərbaycan Respublikasının ev sahibliyi və Azərbaycan Respublikası Xarici İşlər Nazirliyinin təşkilatçılığı ilə BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsi (CW4) keçirilir.
İqlim gündəliyində mühüm beynəlxalq platformaya çevrilən Bakı bu tədbirlər çərçivəsində iqlim qərarlarının praktiki icrası, beynəlxalq əməkdaşlığın genişləndirilməsi və COP31 ərəfəsində qlobal iqlim fəaliyyətinin daha da gücləndirilməsi ilə bağlı müzakirələrə ev sahibliyi edir.
Tədbirlərdə müxtəlif ölkələrin dövlət və hökumət nümayəndələrinin, beynəlxalq təşkilatların, ekspertlərin, maliyyə institutlarının, özəl sektorun və vətəndaş cəmiyyətinin nümayəndələrinin iştirakı gözlənilir.
Bakı İqlim Həftəsi iqlim dəyişmələri ilə mübarizə, enerji keçidi, bərpaolunan enerji, davamlı inkişaf və iqlim fəaliyyətinin sürətləndirilməsi məsələləri ətrafında müzakirələr üçün beynəlxalq platforma kimi nəzərdə tutulub.
Tədbirlərin keçirilməsi Bakının qlobal iqlim gündəliyində fəal rolunu daha da möhkəmləndirməklə yanaşı, COP31 ərəfəsində beynəlxalq iqlim əməkdaşlığının gücləndirilməsinə mühüm töhfə verəcək.
