Azərbaycan, Bakı, 9 yanvar /Trend, müxbir H.Vəliyev/
Rabitə və İnformasiya Texnologiyaları Nazirliyi (RİTN) .az milli domeninin istifadəsi və qeydiyyata alınması qaydalarını baxılması üçün Ədliyyə Nazirliyinə təqdim edib. Bu barədə Trend-ə RİTN-dən deyiblər.
Nazirliyin məlumatına görə, qaydalar domenin qeydiyyata alınmasına və təkrar qeydiyyatına qarşı tələbləri, onların seçilməsi şərtini, domen adlarının reyestrə daxil edilməsini və s. nəzərdə tutur.
Qaydalar, həmçinin milli domenin onlayn qeydiyyata alınması prosesinin tənzimlənməsini əhatə edir.
Sənəddə İnternet şəbəkəsində domen adlarının verilməsi Beynəlxalq Təşkilatının (ICANN) tövsiyələri nəzərə alınıb. Həmin tövsiyələr əsasında domenlərin verilməsi məsələsi tənzimlənəcək.
Nazirlikdən deyiblər ki, tövsiyələrə və yeni qaydalara cavab verməyən domenlərin qeydiyyatı müvafiq olaraq mümkün olmayacaq. Sənəd cümə günü "Elektron Azərbaycan" (e-gov.az) portalında ictimai müzakirəyə çıxarılacaq.
Qeyd edək ki, hazırda .az milli domeni zonasında 20 830 internet resursu qeydiyyatdadır.
