Azərbaycan, Bakı, 30 iyun /Trend, müxbir Hüseyn Vəliyev/
Milli ".az" domenində 22 648 internet-resurs qeydiyyatdan keçib.
Trend-in WHOIS resursuna istinadən verdiyi məlumata görə, 2014-cü ilin birinci yarısının yekunlarına əsasən qeydiyyatdan keçmiş internet-resursların artımı 9,5% olub.
Qeydiyyatdan keçmiş saytların ümumi sayından 21 124 internet-resurs birinci dərəcəli domenin payına düşür ki, bu da ilin əvvəlindəki göstəricidən 9,17% çoxdur. Populyarlığına görə ikinci dərəcəli domen olan ".com.az"-da isə 788 sayt qeydiyyatdan keçib (artım 16,87%). 176 saytın qeydiyyatdan keçdiyi ".edu.az" saytı isə üçüncü yerdədir. Yanvarın 1-nə olan göstərici ilə müqayisədə ".edu.az" domenində qeydiyyatdan keçmiş saytların sayında 3,83%-lik azalma qeydə alınıb.
Dünya statistikasına əsasən, dünyada aktiv domenlərin sayı 200 milyondan çoxdur. 114,1 milyondan çox domenin qeydiyyatdan keçdiyi ".com" bu sahədə birincidir. 15,27 milyondan çox domenin olduğu ".net" ikinci, 13,7 milyondan çox domenin qeydiyyatda olduğu ".de" isə üçüncü sıradadır.
Qeyd edək ki, milli ".az" domeni öz fəaliyyətinə 1993-cü il avqustun 25-də başlayıb. ".az" domenində qeydiyyatdan keçmək 20 manata başa gəlir.
