Azərbaycan, Bakı, 11 sentyabr /Trend, müxbir Hüseyn Vəliyev/
.az domeninə alternativ qeydiyyatçıların meydana çıxması onun qeydiyyatının dəyərinin azalmasına və milli domen zonasında internet resurslarının sayının artmasına imkan verir. Bu barədə Trend-ə Azərbaycanın İnformasiya Problemləri üzrə Tədqiqat Mərkəzinin rəhbəri Yaşar Hacıyev bildirib.
Onun sözlərinə görə, hazırda Azərbaycanda milli domenin yeganə qeydiyyatçısı olan "IntraNS" şirkəti mövcuddur. Onun qeydiyyat siyasəti Azərbaycanın İnternet Cəmiyyəti və Rabitə və Yüksək Texnologiyalar Nazirliyi ilə razılaşdırılıb.
Y.Hacıyev deyib ki, qeydiyyatçının fəaliyyəti istifadəçilərin hüquqlarını heç bir halda pozmur və məhdudlaşdırmır: "Buna baxmayaraq, ölkədə bir neçə alternativ qeydiyyatçının mövcud olması daha səmərəli olardı. Bu, göstərilən sahədə böyük irəliləyişə şərait yaradır və domenin bazar qiymətinə mütləq təsir edir".
Hazırda .az domen zonasında 22,8 min internet resursu qeydiyyata alınıb ki, onların 93 faizindən çoxu domendə birinci səviyyədə fəaliyyət göstərən resursların payına düşür.
.az milli zonası rəsmən 1993-cü il avqustun 25-dən fəaliyyətə başlayıb. .az domeninin qeydiyyatının dəyəri 20 manatdır, texniki dəstəyin illik dəyəri də təxminən eyni qiymətə başa gəlir.
