...

Azərbaycan Avropa Oyunlarında qızıl medallarının sayını 5-ə çatdırdı (ƏLAVƏ OLUNUB-7) (FOTO+VİDEO)

Baku 2015 : EUROGAMES Materials 14 İyun 2015 19:03 (UTC +04:00)
Bu gün Bakıda kişilər arasında karate yarışlarının qrup mərhələsinə start verilib.
Azərbaycan Avropa Oyunlarında qızıl medallarının sayını 5-ə çatdırdı (ƏLAVƏ OLUNUB-7) (FOTO+VİDEO)

Trend-i buradan izləyin

Yeni nəticələr əlavə olunub (ilk xəbər saat 10:00-da yayılıb)

Azərbaycan, Bakı, 14 iyun /Trend/

Bu gün Bakıda kişilər arasında karate yarışlarının qrup mərhələsinə start verilib.

Trend-in məlumatına görə, Bakı Kristal Zalında keçirilən Oyunlarda təmsilçilərimizin 2-si kata, 4-ü isə kumite yarışlarında gücünü yoxlayacaq.

Bu qrupun ilk görüşü həmyerlimiz Tural Balcanlı ilə türkiyəli Yakan Mehmet arasında olub. Karateçimiz debütdə məğlubiyyətə üzülüb. O, 0:5 hesabı ilə uduzub. Gənc idmançımızın növbəti rəqibi fransız Dak Min olacaq. Avropa və dünya kubokunun mükafatçısı qrupda son olaraq Quta Adriana (Rumıniya) qarşı mübarizə aparacaq.

X X X

B qrupunda mübarizə aparan həmyerlimiz T.Balcanlı ilk görüşündə türkiyəli Y.Mehmetə uduzduqdan sonra fransalı D.Minlə qarşılaşıb. Təmsilçimiz bu dəfə də tatamini məğlub tərk edib (0:5). T.Balcanlı qrupda son olaraq Q.Adrian (Rumıniya) ilə görüşdən 5:0 hesabı ilə qalib ayrılıb.

XXX

Qadın karateçilərin kata yarışlarında B qrupunda mübarizə aparan Adilə Qurbanova yarışla vaxtından əvvəl vidalaşıb. O, almaniyalı Jasmin Bleul, türkiyəli Dilarə Bozan və xorvatiyalı Vlatka Kiuki üstələyə bilməyib.

X X X

Qadın karateçilər arasında kumite yarışlarının A qrupunda mübarizə aparan İrina Zaretska ilk görüşünə qələbə ilə başlayıb. 19 yaşlı idmançımız dünya çempionu Kristina Vizkaino (İspaniya) üzərində inamlı qələbə qazanıb - 6:1. O, növbəti döyüşündə avstriyalı Alisa Tereza Bukingerlə üz-üzə gələcək.

X X X

68 kq çəki dərəcəsində mübarizə aparan karateçi xanımımız avstriyalı rəqibinə 0:4 hesabı ilə məğlub olub. Vasiliki Panetsidou ilə qarşılaşan İ.Zaretska 1:0 hesabı ilə qələbə qazanaraq yarımfinal mərhələsinə vəsiqəni təmin edib.

Karateçimiz bu mərhələdə monteneqrolu Marina Rakoviçlə qarşılaşacaq.

X X X

Kişilər arasında 84 kq çəki dərəcəsində mübarizə aparan Ayxan Mamayev isə yunan, ukraynalı və fransız rəqibləri ilə döyüşlərdə 2 qələbə qazanmaqla - müvafiq olaraq, 0:0, 6:3, 6:1 - yarımfinal mərhələsinə adlayıb.

X X X

Karateçimiz İ.Zaretska yarımfinal mərhələsində monteneqrolu M.Rakoviçlə qarşılaşıb. Təmsilçimiz rəqibinə 1:0 hesablı qalib gələrək növbəti mərhələyə yüksəlib.

Finalda o, qrup mərhələsində qarşılaşdığı avstriyalı A.T.Bukingerlə üz-üzə gələcək.

X X X

A.Mamayev də yarımfinal görüşünə çıxıb. O, kosovalı Alvin Karaqi ilə qarşılaşıb. Rəqibini 6:1 hesabı ilə məğlubiyyətə uğradan karateçimiz finala yüksəlib.

Təmsilçimiz finalda yunanıstanlı Mixail Georgios Tzanosla qarşılaşacaq.

X X X

İ.Zaretska finalda avstriyalı A.T.Bukingerlə qarşılaşaraq inamlı qələbə qazanıb - 8:1. Xatırladaq ki, təmsilçimiz qrup oyununda avstriyalı karateçiyə 0:4 hesabı ilə məğlub olmuşdu.

Beləliklə, Azərbaycan Avropa Oyunlarında 9-cu medalını qazanıb.

X X X

Ardınca A.Mamayev final görüşünə çıxıb. Yunanıstanlı rəqibi M.G.Tzanosla qarşılaşan karateçimiz döyüş 1:1 hesabı ilə başa çatdığından hakimlərin qərarına uyğun olaraq qalib tərəf seçilib.

Beləliklə, karateçimiz kumite yarışlarında qələbə qazanmaqla Azərbaycanın Avropa Oyunlarında əldə etdiyi qızıl medalların sayını 5-ə çatdırıb.

Məqalədə:
Xəbər lenti

Xəbər lenti