Bakı. Trend:
Bu il Azərbaycan ilk dəfə olaraq İslam Əməkdaşlıq Təşkilatının (İƏT) Mədəniyyət Festivalına ev sahibliyi edir. Bu festival təkcə mədəniyyət bayramı deyil, həm də kreativ sənayelərin inkişafı və beynəlxalq əməkdaşlığın gücləndirilməsi üçün mühüm platformadır. Festival ölkəmizin multikulturalizm dəyərlərinə, mədəni müxtəlifliyə və açıqlığa sadiqliyinin parlaq göstəricisidir.
Trend xəbər verir ki, bunu Azərbaycan Mədəniyyət Nazirinin müavini Səadət Yusifova “İƏT Mədəniyyət Festivalı: Bakı Yaradıcılıq Həftəsi – 2025” festivalında həsr olunmuş mətbuat-konfransında jurnalistlərə bildirib.
Onun sözlərinə görə, Azərbaycan yenidən yaradıcılıq ideyalarının məhsula çevrildiyi, gənc istedadların dəstək tapdığı və mədəni layihələrin beynəlxalq səviyyədə tanındığı mərkəz rolunu oynayır.
“Festival İƏT ölkələri ailəsinin birliyini nümayiş etdirir, həmrəyliyin gücləndirilməsinə töhfə verir və kreativ sənayelər sahəsində əməkdaşlıq üçün yeni perspektivlər açır. Festivalın məqsədi gənc istedadları dəstəkləmək, regionun kreativ bazarının imkanlarını genişləndirmək və sənayelərin inkişafını stimullaşdırmaqdır. Festival regionun yaradıcı qüvvələrini bir araya gətirəcək, yeni ideyalar, beynəlxalq layihələr və mədəni dialoq üçün meydançaya çevriləcək”, – deyə Səadət Yusifova bildirib.
Festival oktyabrın 5-dən 12-dək İslam Əməkdaşlıq Təşkilatının (İƏT), Heydər Əliyev Fondunun və Azərbaycan Respublikası Mədəniyyət Nazirliyinin təşkilati dəstəyi ilə keçiriləcək.
Tədbirdə 50-dən çox ölkədən 300-dən artıq qonağın – dövlət rəsmiləri, beynəlxalq təşkilatların nümayəndələri, tanınmış elm, mədəniyyət və incəsənət xadimləri, eləcə də yaradıcı sənaye üzrə mütəxəssislərin iştirakı gözlənilir. Ümumilikdə festival çərçivəsində beş mindən çox iştirakçı bir araya gələcək. Kino, teatr, moda, dizayn, musiqi, oyun texnologiyaları, rəqəmsal yaradıcılıq və startaplara həsr olunmuş panel müzakirələri, nümayişlər, sərgilər və digər tədbirlər keçiriləcək. Bütün bunlar ölkəmizin kreativ sənaye ekosisteminin qlobal miqyasda təşviqinə töhfə verəcək.
Festival çərçivəsində İƏT üzv dövlətləri mədəniyyət nazirlərinin yüksəksəviyyəli görüşü, “Mədəni və yaradıcı sənayelər forumu” (MYFORUM), “Creative Village”: mədəni və yaradıcı sənayelər sərgisi” (MYEXPO), “Baku Cinema Breeze – 2025” beynəlxalq kino proqramı, “Şərq moda nümayişi” – İƏT ölkələrinin gənc və tanınmış dizaynerlərinin təqdimatları, oyun texnologiyaları üzrə beynəlxalq sammit (G-HUB), eləcə də teatr, musiqi, rəqs və animasiya sahələri ilə bağlı müxtəlif səpkili mədəni layihələr planlaşdırılır.
İƏT tərəfindən 2019-cu ildən müxtəlif üzv ölkələrdə təşkil olunan festival mədəniyyət və yaradıcı sənaye sahələrində əməkdaşlığın dərinləşdirilməsi, xalqlar arasında qarşılıqlı anlaşmanın və dostluq münasibətlərinin inkişaf etdirilməsi məqsədi daşıyır.
Azərbaycanın ilk dəfə ev sahibliyi edəcəyi tədbir ölkəmizin beynəlxalq mədəniyyət platformasında artan rolunu və regionda multikulturalizm, dialoq və əməkdaşlıq ənənələrinin təşviqinə verdiyi töhfəni bir daha nümayiş etdirəcək.
Festivalda mədəniyyətlərarası dialoqun inkişaf etdirilməsi, İslam dəyərlərinin – tolerantlıq, sülh və müxtəlifliyə hörmətin təbliği əsas istiqamətlərdən olacaq. Bununla yanaşı, iqtisadiyyat, təhsil, elm və turizm sahələrində birgə layihələrin təşviqi, üzv dövlətlər arasında dayanıqlı tərəfdaşlıqların qurulması və yaradıcı sənayelərin qlobal iqtisadiyyata inteqrasiyasının gücləndirilməsi nəzərdə tutulur.