Bakı. Trend:
Erməni işğalı nəticəsində torpaqlarından didərgin düşmüş vətəndaşlarımızın azad olunmuş ərazilərə geri qaytarılması bu gün ölkəmiz qarşısında dayanan prioritet məsələdir.
Trend-in məlumatına görə, bunu Azərbaycan xarici işlər nazirinin
müavini Elnur Məmmədov bu gün Ombudsman Aparatının 20 illik
yubileyinə həsr edilmiş “Ombudsmanların və milli insan hüquqları
təsisatlarının biznes və insan hüquqları sahəsində rolu” mövzusunda
Ombudsmanların və Milli İnsan Hüquqları Təsisatlarının Bakı
Beynəlxalq Konfransında çıxışı zaman deyib.
Nazir müavini bildirib ki, son 2 ildə dövlət büdcəsindən işğaldan
azad edilmiş ərazilərin bərpasına 3 milyard dollardan artıq vəsait
yönəldilib. “İşğaldan azad edilmiş ərazilərdə infrastruktur
ermənilər tərəfindən tamamilə məhv edilib. İndi həmin ərazilərin
sıfırdan bərpası lazımdır. Lakin ermənilərin həmin əraziləri
minalarla çirkləndirməsi yenidənqurma və bərpa işləri qarşısında
dayanan əsas maneədir. Ermənilər hələ də mina xəritələrini
verməkdən imtina edirlər. Xəritələrin dəqiqliyi isə heç 25 faiz
deyil. Bu günə qədər 3300-ə yaxın insan mina qurbanı olub”, - deyə
nazir müavini əlavə edib.