Müdafiə Nazirliyinin məlumatı əlavə olunub (ilk xəbər 10:58-də yayılıb)
Azərbaycan, Bərdə, 14 aprel /Trend, müxbir Ş.Cəliloğlu/
Azərbaycan Silahlı Qüvvələrinə məxsus qırıcı təyyarələr və döyüş vertolyotları Ağdam, Tərtər, Ağcabədi istiqamətində təmas xətti boyunca uçuşlar həyata keçirir.
Trend-in bölgə müxbirinin məlumatına görə, uçuşların təlim, manevr xarakterli olduğu bildirilir. Uçuşlarda 10-dan artıq qırıcı təyyarə və döyüş vertolyotları iştirak edir.
Uçuşlar fasilələrlə təkrarlanır.
Azərbaycanın müdafiə naziri Səfər Əbiyev cəbhə bölgəsindədir.
Azərbaycan Müdafiə Nazirliyinin mətbuat xidmətinin rəhbəri Eldar Sabiroğlu Trend-ə bildirib ki, cəbhə bölgəsində hərbi təlimlər keçirilir. Təlimləri müdafiə naziri genral-polkovnik Səfər Əbiyev şəxsən izləyir.
Sabiroğlu deyib ki, bununla yanaşı, nazir cəbhə bölgəsindəki hərbi hissələrə baş çəkərək, şəxsi heyətin döyüş hazırlığını yoxlayır.