Azərbaycan, Bakı, 01 iyul / Trend , müxbir T.Cəfərov/ İranın xarici işlər naziri Mənuçehr Müttəki BMT-nin Sosial-İqtisadi Şurasının sammitində dünyada mövcud iqtisadi böhran və onun geniş şəkildə yayılması haqda ölkəsinin mövqeyini açıqlayacaq.
Bu barədə İranın "İrna" xəbər agentliyi məlumat yayıb.
İranın xarici işlər naziri həmin sammitdə iştirak etmək üçün Nyu-Yorka səfər edib. O, BMT-nin sammitində dünyada iqtisadi böhranın yayılması səbəbləri, xüsusilə ərzaq böhranı haqda İranın mövqeyini bəyan edəcək.
Müttəki sammit çərçivəsində müxtəlif ölkələrin rəsmi şəxsləri və digər nümayəndələri ilə də görüşlər keçirəcək, beynəlxalq məsələlər haqda müzakirələr aparacaq.
Dünyanın müxtəlif ölkələrindən 500-dən çox nümayəndə heyəti, o cümlədən iqtisadi inkişaf nazirləri və beynəlxalq maliyyə qurumları bu sammitdə iştirak etmək üçün Nyu-Yorkdadır. Dünən başlanan sammit işini cümə axşamına kimi davam etdirəcək.
