Azərbaycan, Bakı, 12 dekabr / Trend , müxbir C.Babayeva/ Azərbaycan ziyalıları müxalifətin yalnız səmimi birlik təkliflərini müzakirə edə bilərlər.
"Müxalifətin birliyi demokratik düşərgənin birliyi olmalıdır. Demokratik düşərgənin demokratik qüvvəyə çevrilərək səmərəli olması üçün həmin düşərgənin spektri geniş olmalıdır. Burada həm ziyalılar, həm mütərəqqi fikirli insanlar, həm də alternativ fikir daşıyıcıları da təmsil oluna bilər. Birlik yalnız bu halda sağlam ola bilər", - deyə Azərbaycan Ziyalıları Birliyinin (AZB) sədri Eldəniz Quliyev cümə günü Trend -a bildirib.
Quliyev millət vəkili Pənah Hüseynin müxalifətin yeni birliyi ilə bağlı təklifinin səmimiliyinə şübhə ilə yanaşdığını və bununla bağlı müzakirələrdə iştirak etmədiyini bildirib. "Pənah Hüseyn son zamanlar daha çox nəzəriyyəçi kimi çıxış edir. Onun dedikləri ilə əməli uyğun gəlmir", - deyə AZB sədri bildirib.
Trend - un arayışı: Pənah Hüseyn Xalq, Klassik Xalq Cəbhəsi, Azadlıq, Boyük Azərbaycan, Milli Demokrat partiyalarının birləşdiyi Demokratiya Uğrunda İttifaq adından açıqlama layihəsi yayaraq, "Azadlıq" siyasi bloku (Xalq Cəbhəsi, Liberal, Vətəndaş və İnkişaf partiyaları), Müsavat Partiyası, ADP, AMİP, DUİ, Azərbaycan Naminə İctimai Forumdan ibarət formatda məşvərətçi xarakterli assosiativ qurumun təsis olunmasını təklif edib. Hüseynin təklifinə görə, həmin birlikdə QHT, KİV nümayəndələri, nüfuzlu ziyalılar da təmsil olunmalıdır.
Quliyev bildirib ki, ziyalılar müxalifətin yeniləşməsini istəyirlər. "Müxalifət mübarizəni yeni təfəkkür müstəvisinə keçirməlidir. Siyasi partiya mübarizəsi özünü doğrultmursa, yeni bir fəlsəfə ortaya qoyulmalıdır. Ya müxalif hərəkatlar olmalı, ya da müxalifət partiyaları gənclərə daha çox açıq olmalıdır. Partiyanın sədri əbədi olaraq sədr qalmamalıdır. Belə çıxır ki, həmin partiyada yeni mübarizə fəlsəfəsi təklif edən gənclər yoxdur. Yenilik bu mənada olmalıdır. Müxalifətin yeni təfəkkür tərzi öz içindən gəlməlidir", - deyə o bildirib.
Qarşıdakı seçkilərdə Ziyalılar Birliyinin mövqeyinə gəlincə, Quliyev deyib ki, çox güman ki, seçkilərlə əlaqədar yaradılacaq birliklərdə təmsil olunmayacaq.
"Seçki Məcəlləsinə mütləq demkoratik dəyişikliklər tətbiq edilməlidir. Dəyişikliklər olmayacağı təqdirdə, bələdiyyə və parlament seçkilərinin şəffaf və ədalətli keçiriləcəyinə inanmıram",- deyə AZB sədri bildirib.
Trend - un arayışı: Azərbaycan Ziyalıları Hərəkatı 2003- cü ildə yaradılıb və 2007- ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə saxlamaq üçün ünvan: [email protected]
