Azərbaycan, Bakı, 07 yanvar / Trend , müxbir A.Hüseynbala/ Azərbaycan və Türkiyənin siyasi partiyaları arasında görüşün keçirilməsi gündəmdədir.
"Hadisələrin gedişindən asılı olaraq konfransın keçirilməsi yenidən gündəmə gələ bilər. Məsələ çox ciddi xarakter alarsa, Türkiyə parlamentində təmsil olunan patiyalara dəvətnaməni göndərib konfransı keçirəcəyik", - çərşənbə günü Trend -a görüşün keçirilməsi təşəbbüsü ilə çıxış edən Ana Vətən Partiyasının (AVP) sədri, parlamentin deputatı Fəzail Ağamalı bildirib.
Trend -un arayışı: Azərbaycan parlamentində və Türkiyənin Böyük Millət Məclisində təmsil olunan siyasi partiyaların iştirakı ilə 2009-cu il yarvarın sonunda Bakıda "Türkiyə-Ermənistan münasibətləri: mümkün gözləntilər" mövzusunda nəzərdə tutulan konfrans baş tutmayıb.
Ermənistan-Türkiyə əlaqələri 1993 - cü ildən kəsilib. Səbəb-Ermənistanın beynəlxalq aləmdə qondarma erməni soyqırımı iddiaları ilə Türkiyəyə qarşı kampaniya aparması və Azərbaycanın 20 faiz ərazisini işğal etməsi olub. 2008-ci il sentyabrın 6 - da futbol üzrə Avropa Çempionatı qrup oyunları çərçivəsində keçirilən Ermənistan-Türkiyə oyununa Ermənistan prezidenti Serj Sarkisyan Türkiyə prezidenti Abdulla Gülü Yerevana dəvət edib. Dəvəti qəbul edən Gülün bu səfərindən sonra iki ölkə arasında münasibətlərin normallaşdırılması üçün diplomatik səylər davam etdirilir.
Türkiyə tərəfi Ermənistan -Azərbaycan, Dağlıq Qarabağ münaqişəsinin həll olunmasında da vasitəçilik etməyə çalışır. Bu məqsədlə Türkiyə xarici işlər naziri Əli Babacan Nyu-Yorkda Azərbaycan və Ermənistan xarici işlər nazirlərinin görüşünü təşkil etdi.
Ağamalının sözlərinə görə, indi Türkiyə ilə Ermənistan arasında aparılan danışıqları diqqətlə izləyirlər.
"Ona görə konfrans məsələsi də gündəlikdə qalır. Lakin biz istəyirik ki, iki ölkənin parlamentində təmsil olunan partiyalar arasında aparılacaq müzakirələr nəticəsiz başa çatmasın. Ermənilərdən üzr istəməklə bağlı bir qrup ziyalının təşəbbüsünə Türkiyə hakimiyyət orqanlarının, eləcə də prezident Abdulla Gülün əvvəlkinə nisbətən fərqli münasibəti bizi gözləmə mövqeyi tutmağa vadar edib", - Ağamalı əlavə edib.
AVP sədri deyib ki, konfransın keçirilməsində əsas məqsəd Türkiyə-Ermənistan münasibətləri ilə əlaqədar hər iki cəmiyyətdə yaranan narahatlığı aradan qaldırmaqdır.
"Biz bu məqsədlə indiyədək Türkiyə parlamentində təmsil olunan partiyalarla təşkil olunacaq konfransla bağlı konkret müzakirə aparmamışıq. Amma düşünürəm ki, qardaş ölkənin heç bir siyasi qurumu bu məsələdə kənarda qalmayacaq", - AVP sədri vurğulayıb.
Hakimiyyətyönlü AVP 1991 - ci ildə yaradılıb. Partiya parlamentdə iki deputatla təmsil olunub.
Məqalə müəllifi ilə əlaqə ünvanı: [email protected]
