Azərbaycan, Bakı, 06 fevral / Trend , müxbir C.Babayeva/ Azərbaycanın Yaşıllar Partiyası (AYP) bələdiyyə seçkisinə blok daxilində qatıla bilər.
" "Yaşıllar"ın siyasi xəttinin digər siyasi partiyaların xəttindən ciddi fərqlənməsinə baxmayaraq, bələdiyyə seçkisinə blok şəklində qatıla bilərik", - cümə günü Trend -a AYP sədri Mais Güləliyev bildirib.
Trend -un arayışı: Azərbaycanda bələdiyyə seçkisi bu il keçiriləcək. Azərbaycan Yaşıllar Partiyası 2007-ci ildə yaradılıb, dövlət qeydiyyatına alınmayıb.
Güləliyev dövlət qeydiyyatının olmamasının partiyanın bələdiyyə seçkisində iştirakı üçün çətinlik yaradacağını deyib. "Ümid edirik ki, seçkiyə qədər partiya dövlət qeydiyyatına alınacaq. Partiyanın aktiv fəaliyyəti, aydın strategiyası, beynəlxalq əlaqələri var və dövlət qeydiyyatına alınmaması üçün əsas yoxdur. İstənilən halda partiya bələdiyyə seçkisinə qatılacaq", - AYP sədri bildirib.
Güləliyev həmçinin deyib ki, mart ayında Gürcüstanın Yaşıllar Partiyası ilə birgə Gəncə şəhərində Kür çayının ekoloji problemləri ilə bağlı maarifləndirmə aksiyası keçirəcəklər.
Məqalə müəllifi ilə əlaqə ünvanı: [email protected]
