Bakı.Trend:
Bu gün Bakı Təşəbbüs Qrupunun təşkilatçılığı ilə Belçikanın müstəmləkə keçmişinə və onun hazırkı ağır fəsadlarına həsr olunmuş “Belçika Müstəmləkəçiliyi: Tanınma və Məsuliyyət” adlı beynəlxalq konfrans keçirilir.
Trend xəbər verir ki, tədbirdə Belçikanın keçmiş müstəmləkələri – Konqo Demokratik Respublikası, Ruanda və Burundidən olan nümayəndələr, habelə diplomatlar və rəsmilər iştirak edirlər.
Konfransa 8 ölkədən beynəlxalq hüquq üzrə ixtisaslaşmış mütəxəssislər, tarixçilər, tədqiqatçılar, vətəndaş cəmiyyəti fəalları, reparasiya məsələləri üzrə ekspertlər iştirak edirlər.
Qeyd edək ki, Belçika müstəmləkəçiliyi Konqo Demokratik Respublikasında 10 milyon insanın ölümünə, on minlərlə əlin kəsilməsinə və mədəni resursların talan edilməsinə səbəb olub. Müstəmləkəçilik siyasəti Ruanda və Burundidə 1933-cü ildə 600 000 etnik kimlik kartı paylamaqla etnik bölünmə siyasəti aparması müstəqillik dövründə soyqırımlara (1994- cü il 800 min qətl, 1972-ci ildə isə 150 min qətl hadisəsi) zəmin yaradıb. 1940-1950-ci illərdə 20 000 metis uşaq zorla ailələrdən alınaraq Belçikaya göndərilib. Belçikada yerləşən Tervuren Muzeyində müstəmləkə dövründə 180 min talan edilmiş artefakt saxlanılır. Ruandadan 40 000-dən çox mədəni artefakt (maskalar, könüllü alətlər) talan edilərək Tervuren Muzeyinə aparılıb.
Belçika keçmiş müstəmləkə ərazilərində resurslara, xüsusilə kobalt mədənlərinin 80%-nə nəzarət edərək neokolonial istismarı davam etdirir.
Xəbər yenilənəcək
