Şuşa.Trend:
Azərbaycanda media sahəsindəki islahatlar peşəkar jurnalistikanın gücləndirilməsinə, institusional potensialın artırılmasına, media savadlılığının inkişafına və dezinformasiyaya qarşı dayanıqlılığın möhkəmləndirilməsinə yönəlib.
Trend-in xüsusi müxbiri xəbər verir ki, bunu Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev IV Şuşa Qlobal Media Forumunun ikinci günü çərçivəsində çıxışı zamanı deyib.
"Son illərdə Azərbaycan media mühitinin hərtərəfli modernləşdirilməsini həyata keçirib. Bu islahatlar peşəkar jurnalistikanın gücləndirilməsinə, institusional potensialın artırılmasına, daha yüksək etik standartların tətbiqinə, media savadlılığının inkişafına və tədqiqat sektorunun sürətli texnoloji dəyişikliklərə uyğunlaşmasına dəstək göstərilməsinə yönəlib", – deyə o bildirib.
H.Hacıyevin sözlərinə görə, media islahatı yalnız qanunvericilik dəyişikliklərindən ibarət deyil, eyni zamanda dayanıqlı institutların formalaşdırılması, jurnalistlərə investisiya qoyuluşu, dezinformasiyaya qarşı dayanıqlılığın artırılması və ictimai etimadın möhkəmləndirilməsini əhatə edir.
"Azərbaycan mütəmadi olaraq beynəlxalq dezinformasiya kampaniyalarının hədəfinə çevrilir", – deyə o qeyd edib və əlavə edib ki, hökumətlər, media, texnologiya şirkətləri, akademik ictimaiyyət və vətəndaş cəmiyyəti dəqiqlik, şəffaflıq və hesabatlılıq prinsiplərinə əsaslanan informasiya mühitinin formalaşdırılmasına görə birgə məsuliyyət daşıyırlar.
O vurğulayıb ki, müxtəlif maraqlı tərəflər arasında əməkdaşlıq daha etibarlı və məsuliyyətli qlobal media sisteminin yaradılması üçün ən mühüm şərt olaraq qalır.
