Azərbaycan, Bakı / Trend , müxbir İ.Əlizadə/ Milli Məclisin aprelin 13-də keçiriləcək iclasında "Bələdiyyələrə əlavə səlahiyyətlərin verilməsi haqqında" qanun layihəsi müzakirə olunacaq. Bu barədə cümə axşamı Milli Məclisin mətbuat xidmətindən məlumat verilib.
Qanun layihəsini parlamentin Regional məsələlər daimi komissiyası hazırlayıb. Qanun müvafiq icra hakimiyyəti orqanları tərəfindən bələdiyyələrə yerli əhəmiyyətli məsələlərin həlli üçün əlavə səlahiyyətlərin verilməsini və bunun həyata keçirilməsini müəyyən edəcək. Müvafiq icra strukturları bələdiyyə orqanlarına dövlət mülkiyyətində olan obyektlərin idarə olunması, yaşayış fondu, qeyri-yaşayış binaları, infrastruktur obyektlərinin istismarı, ictimai nəqliyyatın, təsərrüfat yollarının, təhsil, mədəniyyət, səhiyyə, idman və bədən tərbiyəsi ilə bağlı sahələrin idarə olunması və inkişafı, bələdiyyə ərazisində yerləşən tarixi abidələrin, park və qəbristanlıqların abadlaşdırılması, vətəndaşlıq vəziyyəti aktlarının qeydiyyatı ilə bağlı müəyyən səlahiyyətlər verə bilər.
İclasda həmçinin "Penitensiar müəssisələrdə cəza çəkmədən azad edilmiş şəxslərin sosial adaptasiyası haqqında" və "Dövlət borcu haqqında" qanun layihələri müzakirə olunacaq.