Azərbaycan, Qazax, 20 fevral / Trend , müxbir N.Fəttulayeva/ Azərbaycanın Ağstafa rayonunda yaz aylarında daşqınların qarşısını almaq məqsədilə Ağstafaçayın ətrafında sahilbərkitmə işlərinə və körpünün bərpasına başlanılıb. Bu barədə çərşənbə günü jurnalistlərə Ağstafa rayonu icra başçısının birinci müavini Ramiz Tatarov məlumat verib.
Ötən il Qərb bölgəsinə aramsız yağan yağışlar Ağstafaçayın suyunun təxminən 40 faiz artmasına və çayın daşmasına səbəb olub. Nəticədə çay üzərindəki avtomobil yolu körpüsü tamamilə uçaraq, istifadəyə yararsız hala düşüb, bununla yanaşı Ağstafa rayonunun Poylu qəsəbəsini digər 7 kəndlə birləşdirən körpünün beton sütunlarından biri yerindən sürüşüb, körpünün bir hissəsi uçub. Körpünün uçması nəticəsində sakinlər körpünün qarşı tərəfində olan kəndlərə getmək üçün Qazax rayonu ərazisindən keçməklə iki dəfə çox yol qət etməli olurlar. Ağstafaçayın suları həmçinin yaxın ərazidə yerləşən 4 sakinin evinin pay torpaqlarının xeyli hissəsini də yuyub. Ötən il Kür çayının daşması nəticəsində rayonun Pirli kəndinin 300 hektara yaxın, Qırıqkəsəmən kəndinin isə 20 hektardan çox təsərrüfatını su altında qalıb.
Ötən il Ağstafa və Kür çaylarının daşması ilə Ağstafa rayonu təsərrüfatına təxminən 1 milyon manatdan çox ziyan dəyib.
Tatarov deyib ki, Ağstafaçayın sahilində 2, Kür çayı sahilində isə 3 kilometrlik bəndlərin çəkilməsi nəzərdə tutulur. Onun sözlərinə görə, artıq Fövqəladə Hallar Nazirliyi və Su Kanal İdarəsinin təşəbbüsü ilə bərpa işlərinə başlanılıb. Kür çayı ərazisində qalan Pirli və Qıraqkəsəmən kəndlərini sel sularından qorumaq üçün bəndlər çəkiləcək.