Azərbaycan, Bakı, 01 dekabr / Trend , müxbir K.Zərbalıyeva/ Azərbaycanda miqrantların mövcud problemlərinin bir daha dəqiqləşdirilməsi, onların hüquq və azadlıqlarının pozulmasına səbəb olan halların müvafiq dövlət orqanlarının nəzərinə çatdırılması və bu halların aradan qaldırılması məqsədilə "Miqrant həftəsi" elan edilib. Bu barədə Trend - a bazar ertəsi "Azərbaycan Miqrasiya Mərkəzi" İctimai Birliyindən məlumat verilib.
Məlumatda bildirilib ki, "Miqrant həftəsi" 18 dekabr Beynəlxalq Miqrant Günü münasibətilə elan olunub və dekabrın 15 - dən 22 - dək olan dövrü əhatə edəcək.
Həftə ərzində miqrantlara pulsuz hüquqi yardım göstəriləcək, onların problemlərinin həlli üçün müvafiq dövlət orqanlarına müraciətlər hazırlanacaq. Miqrant həftəsində müxtəlif hesabatların təqdimatları keçiriləcək və dövlət orqanları ilə miqrantların görüşünün təşkili üçün təşəbbüslər göstəriləcək, miqrantların məlumatlılığını artırmaq məqsədilə digər tədbirlər həyata keçiriləcək.Birliyin məlumatına görə, dünyada hər 35 nəfərdən biri, Azərbaycanda isə, hər 8 nəfərdən biri miqrantdır. Hazırda dünyada miqrantların sayı 200 milyon, Azərbaycanda isə 1 milyona yaxındır. Azərbaycan dünyada ərazisində ən çox daxili miqrant məskunlaşmış ölkədir. Dünyadakı miqrantların təxminən 48 faizini, Azərbaycandakı miqrantların 53 faizini qadınlar təşkil edir. Dünyada miqrantların 97- 98 faizi başqa ölkə vətəndaşları olduğu halda, Azərbaycanda miqrantların 70 faizi ərazilərin işğalı nəticəsində ölkə daxilində yaşayış yerini dəyişməyə məcbur olmuş daxili miqrantlar, yəni Azərbaycan Respublikasının vətəndaşlarıdır.
Başqa ölkələrdə məskunlaşan və yaşayan miqrantlar, əsasən, yerli əhali ilə eyni milli mənsubiyyətə malik olmayan şəxslərdir, Azərbaycanda məskunlaşan miqrantların 90 faizdən çoxu, milli mənsubiyyətinə görə, azərbaycanlılardır. Məqalə müəllifi ilə əlaqə ünvanı:[email protected]