Azərbaycan, Bakı, 25 iyun /Trend, müxbir Y.Ostapenko/
Psixi xəstəliklərdən əziyyət çəkən Azərbaycan vətəndaşları Azərbaycan Səhiyyə Nazirliyinin yeni layihəsi sayəsində ixtisaslaşdırılmış sosial yardımdan istifadə edə bilərlər.
"Psixi sağlamlığın mühafizəsi" layihəsi çərçivəsində bilavasitə paytaxtın tibb müəssisələrində və Gəncə, Şəki, Quba və Lənkəranda beş sosial yardım mərkəzi açılacaq.
İki ilə nəzərdə tutulan layihəyə tamamilə Avropa İttifaqı sponsorluq edəcək.
Layihənin əlaqələndiricisi Nərminə Hacıyeva hesab edir ki, bu, psixi xəstəliklər və onların müalicəsinin zəruriliyi haqqında əhalinin pis məlumatlandırılması probleminin ciddi şəkildə mövcud olduğu Azərbaycanda ilk belə layihədir.
"Bəzi adamlar dərk etmirlər ki, onlara və ya onların yaxınlarına xüsusi yanaşma və müalicə lazımdır. Getdikcə bu insanlar cəmiyyətdən təcrid olunurlar. Onlarla hər hansı əlaqədən qaçaraq uzaqlaşırlar", - Hacıyeva Trend-ə bildirib.
Onun sözlərinə görə, əhalinin məlumatlandırılmaması problemi xüsusilə ölkənin kənd regionlarında ciddi şəkildədir.
Sosial yardım mərkəzlərinin açılışı insanlara təkcə onların hüquqlarını izah etmək deyil, həm də onların hər gün üzləşdikləri sosial, hüquqi və məişət problemlərini aşkara çıxarmaq, eləcə də onların təkliflərini dinləməkdir.
"Müəyyən qrup insanın ixtisaslaşdırılmış tibbi yardım almaq hüququnun olmaması problemi ilə tez-tez üzləşirik, halbuki faktiki olaraq onların buna ehtiyacları var, - Hacıyeva bildirib. - Bu, qeydiyyatı və vətəndaşlığı olmayanlara və müvafiq olaraq ixtisaslaşdırılmış tibbi müəssisələrdə uçota dura bilməyən şəxslərə aiddir".
O bildirib ki, Azərbaycanda çoxlu sayda qaçqın olduğundan bu qanunverici uyğunsuzluq böyük problem doğurur.
Mərkəzlərin işçiləri psixi xəstəliklər sahəsində qanunvericilikdə bu və ya digər əlavə və dəyişikliklər edilməsi ilə bağlı hökumətə tövsiyələrlə müraciət etmək hüququna malikdirlər. Layihə əlaqələndiricisinin sözlərinə görə, vətəndaşların oxşar problemlərlə bağlı çoxlu sayda müraciətləri problemin diqqətəlayiq olduğuna bir işarə olacaq.
Səhiyyə Nazirliyi psixi cəhətdən xəstə olan vətəndaşların statistikası haqqında məlumata malik deyil.
Dövlət Statistika Komitəsinin məlumatına görə, hazırda Azərbaycanda 130 minə yaxın insan psixi xəstəliklərlə uçotda durur. 100 min nəfərdən 1450-də psixi xəstəliklər aşkar edilib. Xəstələrin sayı ildən-ilə artır. Əgər 2000-ci ildə müalicə-profilaktika müəssisələrində uçota duranların sayı 97 279 nəfər təşkil edirdisə, artıq 2009-cu ildə onların sayı 126 824 nəfərə çatıb.
İyunda Azərbaycan Parlamenti "Psixiatriya haqqında" qanuna dəyişiklikləri müzakirə edib ki, həmin dəyişikliklərə görə, bu qrupdan olan insanların hüquqları genişləndiriləcək. Dəyişikliklərə görə, psixi cəhətdən xəstə insanların hüquqlarının müdafiəsi məqsədilə onlara ombusdmanla, dini nümayəndələrlə görüşmək və dini toplantılarda iştirak etmək imkanı veriləcək.
