Bakı. Trend:
Gədəbəyin Söyüdlü kəndində baş verən proseslər təşkil olunur, idarə olunur.
Trend xəbər verir ki, bu fikri deputat Elman Nəsirov Milli Məclisin bu gün keçirilən iclasında deyib.
Onun sözlərinə görə, bir çox insanlar vəziyyəti düzgün təhlil edə bilmir: “Sosial şəbəkələrdə səs-küy yaradanlar elə düşünür ki, hadisələr birdənbirə baş verib. Amma elə deyil, bu təxribat əvvəldən təşkil olunub. Hadisədən bir müddət əvvəl iki nəfər yas yerində, pul toplayıblar ki, sözügedən hadisələr təşkil olunsun. Söyüdlü hadisələrinin təşkilində bir sıra adlar çəkilir, istintaq gedir və yeni adlar ortaya çıxır. Bütün bunlar onu göstərir ki, Söyüdlu kəndin sadə vətəndaşları təxribata cəlb olunublar”, - deyə o əlavə edib.
Xatırladaq ki, Gədəbəy rayonunun Söyüdlü kəndində bir qrup şəxs kənd ərazisində süni gölün tikintisinə etiraz olaraq iyunun 20-də aksiya keçirməyə cəhd göstərib. Aksiyanın qarşısı alınan zaman polislə sakinlər arasında insident baş verib. Söyüdlü kəndində vəziyyətin araşdırılması üçün komissiya yaradılıb.