Bakı. Trend:
Naxçıvan MR dəmir yolunun yenidən qurulmasın üçün tam layihə sənədləri hazırlanır.
Trend xəbər verir ki, bunu "Azərbaycan Dəmir Yolları" QSC-nin sədri Rövşən Rüstəmov jurnalistlərə açıqlamasında deyib.
O qeyd edib ki, dəmir yolu artıq Horadiz-Ağbənd istiqamətinə doğru sürətlə çəkilir.
Qeyd edək ki, Horadiz-Ağbənd dəmir yolu xəttinin uzunluğu 110.4 km, yan yollarla birlikdə 140.6 km-dir. Dəmiryol xətti üzrə 8 stansiya, 3 ədəd tunel, 47 ədəd körpü, 5 ədəd yolötürücü, 7 ədəd avtomobil alt keçidi, müxtəlif olçüdə qalereyalar və istinad divarları layihələndirilib.
Eyni zamanda 110.4 km elektrik təchizatı, rabitə və işarəvermə sistemləri layihələndirilib. Bu layihə çərçivəsində ilk dəfə olaraq 771 m uzunluğunda Azərbaycanın ən uzun dəmiryol körpüsü və uzunluğu 1072 m olan tuneli layihələndirilib. Naxçıvanla birbaşa nəqliyyat bağlantısı təmin edəcək Horadiz-Ağbənd dəmir yolu həm daxili, həm də beynəlxalq daşımaların potensialını əhəmiyyətli dərəcədə artıracaq.