Bakı. Trend:
Xaçmaz Rayon İcra Hakimiyyətinin təşkilatçılığı ilə rayonda fəaliyyət göstərən təhsil, səhiyyə, mədəniyyət, gənclər, idman və digər təşkilatlarda Xocalı soyqırımının 34-cü ildönümünə həsr olunmuş müxtəlif tədbirlər keçirilib.
Trend xəbər verir ki, yığıncaqlarda Xaçmaz Rayon İcra Hakimiyyətinin məsul əməkdaşları, şəhid ailələri, qazilər və ictimaiyyət nümayəndələri iştirak ediblər.
Tədbirlərdə 1992-ci il fevralın 26-da erməni vandalizmi nəticəsində həlak olmuş 613 dinc sakinin, o cümlədən 106 qadının, 63 uşağın və 70 qocanın, eləcə də torpaqlarımızın azadlığı uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Məktəblərdə Xocalı soyqırımına həsr olunmuş ədəbi-bədii kompozisiyalar və videoçarxlar nümayiş olunub, idman yarışları təşkil edilib. Mədəniyyət müəssisələrində “Xocalı – yaddaşımızın qan yarası” mövzusunda sərgilər yaradılıb, yığıncaqlar keçirilib.
Qeyd olunub ki, bu gün biz yalnız xatirələri yad etmir, həm də gələcək nəsillərə tarixi ədaləti, vətənpərvərliyi və birliyi aşılayırıq. Xocalı – bizim qan yaddaşımız, milli qürurumuz və əbədi həqiqətimizdir!
