Bakı. Trend:
Dünyanın ən böyük audit-konsaltinq şirkətlərindən olan “EY” şirkəti “EY İlin İş Adamı™” müsabiqəsinə növbəti dəfə start verib. Ölkəmizdə kiçik və orta sahibkarlığın inkişafı yönündə layihələr həyata keçirən Azərbaycan Beynəlxalq Bankı da müsabiqəyə dəstək verir. Müsabiqənin daha bir sponsoru isə BP şirkətidir.
“EY İlin İş Adamı™” öz cəmiyyətində, ölkəsində, ümumən dünyada həyat keyfiyyətlərini yüksəltməkdən ötrü çalışan, liderlik, uğur nümayiş etdirən şəxslərin və şirkətlərin sahibkarlıq nailiyyətlərini tanıyan qlobal proqramdır. Proqram 30 ildən çoxdur ki, təsis edilib və hazırda dünyanın 60-dan çox ölkəsində, 145 şəhərində hər il mütəmadi keçirilir. “EY İlin İş Adamı™” müsabiqəsi ötən il ölkəmizdə də ilk dəfə Azərbaycan Beynəlxalq Bankının dəstəyi ilə baş tutub. Yeni müsabiqədə iştirak etmək istəyən sahibkarlar, iş adamları, müəssisə rəhbərləri öz ərizələrini 21 noyabr 2020-ci ilədək proqramın təşkilat komitəsinə təqdim edə bilərlər.
Proqram Azərbaycanda istənilən sahədə fəaliyyət göstərən sahibkarlar üçün açıqdır. Müsabiqədə iştirak etmək istəyən şirkətin son iki il ərzində 300 min manatdan 30 milyon manatadək dövriyyəsi olmalıdır. Uyğunluq meyarları və proqramla bağlı ətraflı məlumatı buradan əldə etmək olar.
Müsabiqənin finalçıları və qalibi tanınmış sahibkarlar, dövlət şirkətlərinin top-menecerləri, beynəlxalq maliyyə qurumlarını təmsil edən idarəçilərdən ibarət müstəqil münsiflər heyəti tərəfindən seçiləcək. Milli müsabiqənin qalibi "EY Dünya Üzrə İlin İş Adamı" müsabiqəsində Azərbaycanı təmsil etmək və digər ölkələrin finalçıları ilə yarışmaq imkanı qazanacaq.
Azərbaycan Beynəlxalq Bankının İdarə Heyətinin sədri Abbas İbrahimov bildirib: “Ötən il “EY İlin İş Adamı™” müsabiqəsi ölkəmizdə ilk dəfə uğurla baş tutdu. Pandemiya ilə bağlı məhdudiyyətlərə baxmayaraq onlayn həllərin köməyi ilə qalibin seçilməsi mümkün oldu. Azərbaycan Beynəlxalq Bankı bu il keçirilən müsabiqəyə də məmnuniyyətlə dəstək verir. Məqsədimiz sahibkarlara öz işgüzar əlaqələrini genişləndirmək, bizneslərini böyütmək, şirkət və komanda profillərini yüksəltmək üçün yeni imkanlar yaratmaqdır”.
Müasir dövlət bankı olan Azərbaycan Beynəlxalq Bankının məhsul və xidmətləri barədə məlumatları bankın 37 filial və 39 şöbəsindən, www.ibar.az internet səhifəsindən, 937 nömrəli Məlumat Mərkəzindən, həmçinin rəsmi “Facebook” səhifəsindən əldə etmək olar.