Bakı. Trend:
Anglo Asian Mining plc şirkəti Azərbaycandakı Dəmirli mis mədəninin qiymətləndirilməsini davam etdirir və istehsalın ilin sonuna qədər bərpa olunacağını gözləyir.
Trend bu barədə şirkətə istinadən xəbər verir.
Məlumata görə, Anglo Asian Mining-in strateji inkişaf planı, şirkətin 2029-cu ilə qədər orta səviyyəli mis və qızıl istehsalçısına çevrilməsi üçün aydın bir yol xəritəsi müəyyənləşdirir. Bu müddətə qədər mis əsas məhsul olacaq və proqnozlaşdırılan illik hasilat 50 000–55 000 ton mis ekvivalenti təşkil edəcək.
Bu artımı təmin etmək üçün şirkət 2025–2029-cu illər arasında dörd yeni mədəni - Zəfər, Gilar, Xarxar və Qaradağ mədənlərini istismara verməyi planlaşdırır. Gilar mədənində hasilatın 2025-ci ilin əvvəlində başlanacağı gözlənilir.
Qeyd edək ki, Anglo Asian Mining plc Azərbaycanda qızıl, mis və gümüş hasilatı ilə məşğuldur və yüksək keyfiyyətli aktivlərə malikdir. 2024-cü ildə şirkət 16 760 unsiya qızıl (qızıl ekvivalentində - GEO) hasil edib. 2024-cü ildə istehsal ekoloji səbəblərdən qismən dayandırıldığı üçün ciddi şəkildə məhdudlaşdırılmışdı, lakin ilin sonuna qədər fəaliyyət tam bərpa olunub.