Azərbaycan, Bakı, 20 noyabr/ Trend , müxbir N.İsmayılova/ "AtaBank yeni İnternet Banking bank xidmətinin tətbiqinə hazırlaşır", - Bankın İdarə Heyəti sədrinin müavini Müseyib Əliyev cümə axşamı bankın 15 illiyinə həsr olunmuş mətbuat konfransında bildirib.
"Internet Banking xidmətinin köməyi ilə bankın müştərilərinə əməliyyatları onlayn rejimdə aparmaq imkanı veriləcək", - Əliyev vurğulayıb.
O, yeni xidmətin tətbiq ediləcəyi tarixi dəqiqləşdirməyib.
2009-cu ildə bank maliyyə göstəricilərinin artımı və institusional inkişafı davam etdirmək niyyətindədir.
"AtaBank Azərbaycan banklarının - maliyyə göstəriciləri üzrə liderlərin onluğuna daxil olur və biz gələcəkdə də bu mövqeləri saxlamaq niyyətindəyik, - Əliyev əlavə edib. - Gələn il bank yalnız bu statusun saxlanılması üzrə deyil, həm də lider mövqelərinin əldə edilməsi məqsədilə siyasət aparacaq".
Onun sözlərinə görə, AtaBank qarşısına aşağıdakı vəzifələri qoyub: müştərilərə xidmət şəbəkəsini genişləndirməyi, əməkdaşların peşəkar səviyyəsinin daha da təkmilləşdirilməsini, yeni xidmətlər və məhsulların təqdim edilməsi, beynəlxalq kredit və depozit reytinqinin alınması.
Əliyev ortamüddətli perspektivdə bankın əsas fəaliyyət istiqamətləri arasında satış və marketinq sistemlərinin təkmilləşdirilməsini; daha yüksək keyfiyyətli xidmətin təmin edilməsi; marketinq strategiyasını və reklam siyasətinin müasir tələblərə uyğun vəziyyətə gətirilməsini; müştəri reytinq sistemi və müştəri seqmentasiyasının yaradılması; filiallarda müştəri xidmətlərinin keyfiyyətinin yaxşılaşdırılmasını; avtomatlaşdırılmış satış və elektron müştəri məlumatlandırma sistemlərinin tam mənimsənilməsinin adını çəkib.
AtaBank-ın filial şəbəkəsinin genişləndirilməsi də bankın strategiyasının əsas fəaliyyət istiqamətlərindən biri olacaq. 2009-cu ildə Şəmkirdə bankın filialının açılması planlaşdırılır. Bakıda da ən azı üç filialın açılışı nəzərdə tutulur.
Noyabrın 20-nə olan cari mübadilə məzənnəsi -- 0,8104 AZN/USD.
Müəlliflə əlaqə saxlamaq üçün elektron ünvan: [email protected]
