Azərbaycan, Bakı, 30 yanvar/ Trend , müxbir N.İsmayılova/
2008-ci ildə Azərbaycanda bağlnan əmək müqavilələrinin sayı 2007-ci il ilə müqayisədə 2,5 dəfədən çox artıb. Bu barədə cümə günü Baş Əmək Müfəttişliyinin rəhbəri Nəbi Şükürlü mətbuat konfransında bildirib.
Ötən il imzalanmış əmək müqavilələrinin sayı 2007-ci ildəki10 917 ədədə nisbətən 27 781 ədəd təşkil edib.
"Bu, əməkdaşların əmək müqaviləsi bağlanmadan işə qəbuluna görə cərimələrin sərtləşdirilməsi ilə izah olunur", - deyə Şükürlü bildirib.
2008 -ci ildə qeydə alınan inzibati qanun pozuntuları nəticəsində, ümumi məbləği 890 235 manat olan cərimə tətbiq edilib ki, bu da 2007-ci ilin göstəricisini təqribən üç dəfə üstələyir. İnişil isə 310 178 manat həcmində cərimə ödənib.
İnzibati Xətalar Məcəlləsinə edilən dəyişikliklərə əsasən, cərimələrin sərtləşdirilməsi ilə əlaqədar olaraq 2009-cu ildən əmək müqaviləsi bağlanmadan işə qəbula görə cərimə iki mindən üç min manatadək dəyişir. 2008-ci ildə tutduğu vəzifədən qanunsuz kənarlaşdırılan 31 nəfər, onların Dövlət Əmək Müfəttişliyinə şikayətlərinə baxıldıqdan, sonra işə bərpa olunub. 2007-ci ildə 53 nəfər öz işinə qaytarılıb.
Ümumilikdə 2569 müəssisədə dövlət nəzarəti həyata keçirilib ki, bu da 2007-ci ildə qeydə alınandan 148 müəssisə çoxdur. Onlardan 1119 ədədi dövlət, 1450 ədədi qeyri - dövlət müəssisəsidir.
Yanvarın 30-na olan rəsmi məzənnə 0,8067 AZN/USD təşkil edir.
Məqalə müəllifi ilə əlaqə ünvanı - [email protected]