Azərbaycan, Bakı, 30 yanvar/ Trend , müxbir N.İsmayılova/
Azərbaycanın ixracatçılarının problemlərinin və onların GSP və GSP+ Proqramlarının təqdim etdiyi güzəştləri almaq imkanlarının müzakirəsi üçün yanvarın 30-da dövlət xidmətləri və iri ixracyönlü şirkətlərin nümayəndələri ilə Dəyirmi Masa keçirilib, ölkənin İqtisadi İnkişaf Nazirliyindən cümə günü bildiriblər.
Dəyirmi Masada nazirlik yanında struktur bölmələrinin nümayəndələri və qeyri - neft sektorunda fəaliyyət göstərən iri ixracatçı şirkətlərin 60-a yaxın nümayəndəsi iştirak edib.
İqtisadi inkişaf naziri Şahin Mustafayev bildirib ki, Azərbaycanda qeyri - neft sektoru məhsullarının ixracının artırılmasının stimullaşdırılması üçün məqsədyönlü tədbirlər həyata keçirilir. Onun sözlərinə görə, Azərbaycan hökuməti işgüzar mühitin yaxşılaşdırılması prosesini, sahibkarlığa dövlət dəstəyinin gücləndirilməsini davam etdirməyi planlaşdırır. Bu müəssisələrin qarşılaşdığı problemlərin öyrənilməsi məqsədilə, şirkətlərin nümayəndələrinə xüsusi sorğu anketləri paylanılıb.
Görüşdə qeyd olunub ki, qlobal maliyyə və iqtisadi böhran şəraitində ixracatçı şirkətlər bir sıra çətinliklərlə üzləşə bilərlər və bu çətinliklərin aradan qaldırılması üçün fəaliyyət planı hazırlanıb.
Tədbir iştirakçılarına Amerikanın GSP və GSP+ Proqramları, bu proqramların üstünlükləri barədə məlumat təqdim edilib.
Nazirlik ixracatçıları sahibkarlığın dəstəklənməsi üzrə gələcək planlar barədə məlumatlandırıb.
Müəlliflə əlaqə saxlamaq üçün elektron ünvan: [email protected]