Azərbaycan, Xaçmaz, 24 aprel / Trend , müxbir N.İsmayılova /
Azərbaycanın şimalında - Xaçmazda yerləşən Qafqaz Konserv Zavodu MDB Standartlaşdırma və Sertifikasiya Komitəsində sertifikat almaqdan ötrü birinci mərhələni başa vurub. Bu barədə Azersun Holding-in əlaqələr şöbəsinin rəhbəri Afiq Cəfərov deyib.
"Sertifikat alındıqdan sonra zavod daha sərbəst və çox miqdarda Rusiya ilə digər MDB ölkələrinə məhsullarını ixrac edə bilər", - Cəfərov deyib.
Hazırda zavod sertifikasiyanın ikinci (sonuncu) mərhələsini keçir və prosedur ilkin hesablamalara görə bir ay sonra başa çatacaq. Cəfərovun sözlərinə əsasən, Rusiya və digər MDB dövlətlərinin şirkətləri zavodun məhsulunu alarkən sözügedən sertifikatı tələb etdikləri üçün buna ehtiyac yaranıb.
Zavod gün ərzində 80 ton pomidor pastası, 50 ton ət, 30 ton duzlama, 5 ton mürəbbə və 20 ton kompot hazırlamaq gücündədir.
"Qafqaz Konserv Zavodu" MMC 2003-cü il sentyabrın 12-də açılıb.
Müəssisə Almaniya, İtaliya və Fransadan gətirilmiş müasir avadanlıqlarla təchiz edilib. Bundan əlavə, zavodun ərazisində istehsalat-təcrübə laboratoriyası fəaliyyət göstərir.
Məqalə müəllifi ilə əlaqə ünvanı: [email protected]