Azərbaycan, Bakı, 27 avqust / Trend , müxbir Ü.İsmayılova /
Azərbaycan Respublikası Sahibkarlar Təşkilatları Milli Konfederasiyası (AMSTK) və Koreyanın Orta və Kiçik Biznes Administrasiyası qarşılıqlı əməkdaşlıq haqqında protokol imzalamağı planlaşdırır. Bu barədə cümə axşamı AMSTK-nın prezidenti Məmməd Musayev bildirib.
"Əməkdaşlıq haqqında müqavilənin bağlanmasında məqsəd Azərbaycan mallarının Koreyaya və əksinə, ixracın stimullaşdırılmasıdır", - Musayev bildirib.
Onun sözlərinə görə, hazırda Koreya Respublikasının Azərbaycanın ümumi ixracında rolu cəmi altı faiz, idxalda isə daha az təşkil edir. "Bu olduqca kiçik göstəricilərdir, gələcəkdə onların əhəmiyyətli dərəcədə artırılması planlaşdırılır", - Musayev bildirib.
Konfederasiyanın prezidenti bildirib ki, Koreya şirkətləri əsasən Azərbaycandan nar, üzüm, şərabçılıq məhsulları kimi kənd təsərrüfatı məhsullarının idxalında maraqlıdırlar.
Musayev qeyd edib ki, Koreya tərəfi Azərbaycan ilə kənd təsərrüfatı sahəsində əməkdaşlıq istiqamətində danışıqlar aparır.
Hazırda Bakıda Azərbaycan və Koreya sahibkarlarının "Koreyanın tikinti avadanlıqlarının inşası" mövzusunda biznes görüşü keçirilir. Görüşdə 50 Koreya və 100-dən çox Azərbaycan şirkəti iştirak edir. Görüş Koreyanın Azərbaycandakı səfirliyi və Koreyanın Orta və Kiçik Biznes Administrasiyası, həmçinin Koreya Tikinti Texnikası Sənaye Sahibləri Assosiasiyasının dəstəyi ilə təşkil edilib. Bu tədbirin məqsədi yeni tərəfdaşların axtarılması yolu ilə hər iki ölkədə tikinti avadanlıqlarının ticarətinə yardım edilməsi və bu sahədəki bazarın genişləndirilməsidir.
"Aparılan danışıqlara əsasən, Koreyanın tikinti texnikası Azərbaycan ərazisində bütün mövcud hesab formaları, o cümlədən lizinq ilə realizə edilə bilər", - Musayev bildirib.
Azərbaycan və Koreya arasında xarici ticarət dövriyyəsi yanvar-may aylarında 130,94 milyon dollar təşkil edib. Məhsulların idxalına 37,56 milyon dollar, ixraca isə 93,38 milyon dollar düşüb.
Məqalə müəllifi ilə əlaqə ünvanı: [email protected]
