Azərbaycan, Bakı, 16 oktyabr / Trend , müxbir N.İsmayılov/
Azərbaycan Vergilər Nazirliyinin proqnozlarına görə, doqquz ay ərzində ölkənin dövlət büdcəsinə köçürülən vəsait 84 faiz təşkil edib, cümə günü vergilər nazirinin müavini Sahir Məmmədxanov deyib.
"Büdcə proqnozlarının belə icrası neft sektorundan gələn gəlirin, xüsusilə də gəlir vergisinin az olması ilə əlaqədardır", - Məmmədxanov deyib.
Onun sözlərinə görə, "Azəri-Çıraq-Günəşli" (AÇG) yataqlar blokunu işlədən Azərbaycan Beynəlxalq Əməliyyat Şirkətinin (ABƏŞ) gəlir vergisi 300 milyon manat təşkil edib ki, bu proqnozlaşdırılan həcmdən 45 faiz artıqdır.
Bu xətlə 2009-cu ildə dövlət büdcəsinə 1.23 milyard manat həcmində vəsait daxil olacağı gözlənilir. 2008-ci ildə dövlət büdcəsinə 2240.4 milyon manat gəlir vergisi daxil olub. 2007-ci ildə isə bu rəqəm 2.5 milyard manat təşkil edib. 2007-ci ildə neftin bütün növləri üzrə bir barelin orta qiyməti 82-85 dollar arasında olub, 2008-ci ildə isə 147 dollar təşkil edib.
"Proqnozun belə aşağı səviyyəli icrası dünya maliyyə böhranı, həmçinin dünya bazarlarında neftin qiymətinin azalması ilə əlaqədardır. 2008-ci ildə neftin bir barelinin orta qiyməti 105 dollar təşkil edirdi və bu da 2009-cu ilin dövlət büdcəsinin proqnozlarında öz əksini tapmışdı. Cari ilin səkkiz ayı ərzində isə neftin bir barelinin qiyməti 50-55 dollar arasında dəyişib", - nazir müavini deyib.
Bu onu göstərir ki, hazırki vəziyyətdə iqtisadiyyatda proqnoz vermək çətindir. Belə ki, dünya iqtisadiyyatında baş verən çevrilişlər hər hansı fikir formalaşdırılmasına mane olur.
"Amma ARDNŞ bu ilə pronozlaşdırılan gəliri 98 faiz yerinə yetirib, ona görə də qalan üç ay ərzində proqnozu tam yerinə yetirəcək. Dünya bazarlarından fərqli olaraq, daxili bazarda neft və neft məhsullarının qiymətlərinin aşağı və stabil olmasına baxmayaraq, ARDNŞ proqnozu yerinə yetirir və dövlət büdcəsinə vergi ödəyir", - Məmmədxanov deyib.
Nazir müavinin sözlərinə görə, daxili bazardakı qiymət, əsasən aksiz vergisinin artmasından asılıdır ki, bu da hal-hazırda nəzərdə tutulmur.
Doqquz ayın nəticələrinə görə, qeyri-neft sektorundan daxil olan vergi keçən ilin analoji dövrü ilə müqayisədə 108 milyon manat artıq olub. Tikinti şirkətləri tərəfindən dövlət büdcəsinə keçən ilin analoji dövrü ilə müqayisədə 32 milyon manat artıq vəsait köçürülüb.
Məqalə müəllifi ilə əlaqə ünvanı: [email protected]
