Azərbaycan, Bakı, 26 oktyabr / Trend , müxbir N.İsmayılova/
Azərbaycan Beynəlxalq Bankı (ABB) gəlirinin 40 milyon manatlıq hissəsini üçüncü rüb ərzində bankın səhmlərinin nominal dəyərinin artırılması yolu ilə nizamnamə kapitalının artırılmasına yönəlib. Bu barədə bazar ertəsi bankdan yayılan məlumatda deyilir. Bu gün bankın səhmlərinin nominal məbləği 0,2 manat təşkil edir.
Bu qərar maliyyə naziri Samir Şərifovun sədrliyi ilə ABB-nin səhmdarlarının oktyabrın 19-da keçirilən növbədənkənar iclasında qəbul edilib.
İclasda bankın Müşahidəçi Şurasının və Auditor Komitəsinin tərkibi üzrə qərar qəbul edilib.
Yanvar-sentyabr ayları ərzində ABB 92,68 milyon manat xalis gəlir əldə edib. Bankın ümumi aktivləri 4758,57 milyon manat, kredit portfeli isə 3596,35 milyon manat təşkil edib. Bura 345,947 milyon manatlıq istehlakçı kreditləri də daxildir. ABB-nin depozit bazası 1 944,184 milyon manat təşkil edib.
ABB-nin müştərək kapitalı 452,1 milyon manat səviyyəsində olub. Bunun 200 milyon manatı nizamnamə kapitalının payına dşür. Gəlirin bir hissəsinin nizamnamə kapitalına daxil edilməsi ilə müştərək kapital 240 milyon manatadək artıb.
Oktyabrın 1-nə olan vəziyyətə görə, ABB-nin 37 filialı (bu il ərzində bank filial açmayıb) var. Bank 587 bankomata və 2 717 POS-terminala malikdir.
Bankın aktiv plastik kartları hesabat tarixində 1 626 013 ədəd hesablanıb.
Oktyabrın 26-na olan rəsmi məzənnə 0,8031 AZN/USD təşkil edir.
Məqalə müəllifi ilə əlaqə ünvanı: [email protected]
