Azərbaycan, Bakı, 18 oktyabr /Trend, müxbir E.İsmayılov/
TRACECA (Avropa-Qafqaz-Asiya) nəqliyyat dəhlizinin iştirakçıları Qara və Xəzər dənizləri rayonunda dəhliz boyu logistika proseslərini təşkil etməklə dəniz və quru magistrallarının yeni texniki layihəsini həyata keçirmək haqda qərar qəbul ediblər. Bu barədə bazar ertəsi TRACECA-nın Azərbaycan üzrə milli katibi Akif Mustafayev məlumat verib. Yeni layihənin həyata keçirilməsi barədə qərar Brüsseldə (Belçika) təşkil edilən TRACECA hökumətlərarası komissiyasının səkkizinci iclasının yekunları üzrə qəbul edilib.
Onun sözlərinə görə, ilin əvvəlində yeni layihənin təsdiqlənməsi proseduruna başlanacaq. Birinci rübün sonunda isə layihə artıq qəbul edilə bilər.
Mustafayev bildirib ki, bir neçə il ərzində həyata keçiriləcək layihənin əsas məqsədi tədqiqatlar, monitorinqlər, təlim və seminarların təşkili yolu ilə dəhlizin marşrutunun təkmilləşdirilməsidir.
Hazırda TRACECA-ya üzv olan dövlətlər bunlardır: Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna, İran.