Azərbaycan, Bakı, 19 oktyabr /Trend, müxbir İ.Xəlilova/
Dünya Bankı (DB) Direktorlar Şurasında Azərbaycanla dörd il üzrə nəzərdə tutulmuş (2011-2014-cü illər) əməkdaşlıq strategiyasının (Country Partnership Strategy) təsdiqlənməsi müddətini oktyabrın 21-nə təyin edib. Bu barədə çərşənbə axşamı bankın Bakı nümayəndəliyindən məlumat verilib. Bundan əvvəl strategiyanın təsdiqlənməsi məsələsinə oktyabrın 19-da baxılacağı güman edilirdi.
"Strategiyaya baxılma müddətinin dəyişdirilməsi qətiyyən hansısa problemin olması ilə deyil, bankın Direktorlar Şurasın yüklənmiş qrafiki ilə bağlıdır", - DB nümayəndəliyindən bildiriblər.
Bank artıq hökumət, parlament və ölkənin vətəndaş cəmiyyəti ilə məsləhətləşmələr aparıb.
Strategiya çərçivəsində bank hər il ölkəyə 250 milyon dollar ayırmağı planlaşdırıb. DB, ümumilikdə, dörd il ərzində ölkədə layihələrin maliyyələşdirilməsinə, orta hesabla, bir milyard dollar ayırmaq niyyətindədir.
Bankın başlıca ideyası yol inşası və aqrosənaye inkişafı sahəsində uğurlu layihələri davam etdirməkdən ibarətdir.
Bank ekologiya, təhsil sahələrində beş yeni layihəni təsdiqləməyə hazırlaşır. Bundan başqa, kiçik şəhərlərin siyahısını genişləndirməklə su təchizatı və kanalizasiya sistemlərinin təkmilləşdirilməsi layihəsinin davamı da mümkündür.
Dünya Bankı Azərbaycan hökuməti ilə 1992-ci ildən əməkdaşlığa başladığı vaxtdan 2,7 milyard dollar məbləğində 52 layihəni maliyyələşdirib. Bu vəsaitlərdən 1,5 milyard dollardan çox istifadə olunub.