Azərbaycan, Bakı, 26 oktyabr /Trend, müxbir A.Axundov/
Azərbaycan Mərkəzi Bankı (AMB) daşınmaz əmlak bazarında qiymət "köpüyü"nün proqnozlaşdırılması modeli hazırlayıb. Bu barədə çərşənbə axşamı AMB-dən bildiriblər.
Modeldə daşınmaz əmlak bazarında qiymətlərə təsir edən tələb və təklif faktorları müəyyən olunub; bu faktorlar üzrə qiymətlərin tarazlıq səviyyələri hesablanıb və faktiki səviyyənin tarazlıq səviyyəsindən kənarlaşma həddi tapılıb.
Azərbaycanda daşınmaz əmlak bazarında "köpük"lərin səviyyəsinin müəyyən edilməsi
məqsədilə təkrar və ilkin bazarda qiymətlərin tarazlıq səviyyəsi qiymətləndirilib.
AMB-in apardığı ekonometrik testlər və hesablamalar göstərir ki, əhalinin sərəncamda qalan real gəlirləri, daşınmaz əmlaka verilən kreditlər hər iki bazarda, ekspozisiya müddəti isə yalnız təkrar bazarda tələb amili kimi çıxış edir.
Təhlillər göstərir ki, ilkin bazarda qiymət səviyyəsi ilə ekspozisiya müddəti arasında
təsir əlaqələri mövcud deyil. Belə ki, ekspozisiya müddəti artdığı halda, ilkin bazarda qiymət səviyyəsinin azalması müşahidə edilmir.
Mərkəzi Bankın mütəxəssisləri tərəfindən BVF-nin metodologiyasına əsaslanmaqla ilkin bazarda həm tələb və həm də təklif, təkrar bazarda isə yalnız tələb amilləri üzrə tarazlıq səviyyəsi qiymətləndirilib. Daha sonra alınan nəticədən istifadə etməklə qiymət yaradan tələb və təklfi amilləri əsasında ilkin bazarda ümumi tarazlıq səviyyəsi hesablanıb. Alınan nəticə daşınmaz əmlak "köpüyü"nün səviyyəsini müəyyən etməyə və onun boşalması halında yarana biləcək riskləri görməyə imkan verir.
