Azərbaycan, Bakı, 22 noyabr /Trend, müxbir Ə.Yusifzadə/
İran və Azərbaycan arasında imzalanan saziş əsasında yaxın vaxtlarda Azərbaycanda "AzSamand" markalı avtomobillərin istehsalı ayda 700 ədədə qədər artacaq. Bunu "İran Khodro" şirkətinin direktor müavini Mircavad Süleymani deyib. Bu barədə bazar ertəsi "İran Khodro" şirkətinin rəsmi məlumatında bildirilir.
Onun sözlərinə görə, istehsal prosesinin artması Azərbaycanın istehlak bazarındakı vəziyyətdən asılı olacaq.
"İndiyədək "Evsen" şirkətlər qrupuna daxil olan "Elite" şirkəti vasitəsilə Samand və LX markalı 3 mindən çox avtomobil satılıb", - Süleymani deyib.
AzSamand zavodunun istehsal gücü ildə 10 min avtomobil təşkil edir.
"Azərbaycanın avtomobil bazarının ildə 25 min avtomobilə ehtiyacı var və AzSamand şirkəti ölkənin avtomobil bazarında fəaliyyətin genişləndirilməsi barədə qərar qəbul edib", - Süleymani qeyd edib.
"AzSamand" avtomobillərinin istehsalı Şamaxı şəhərində "Evsen" şirkətlər qrupu tərəfindən həyata keçirilir. Avtomobillər kreditlə də satılır.