Azərbaycan, Bakı, 17 fevral /Trend, müxbir N.İsmayılova/
Avropa Şurasının Pulların Yuyulması və Terrorçuluğun Maliyyələşdirilməsinə Qarşı Tədbirlərin Qiymətləndirilməsi üzrə Ekspertlər Komitəsi (MONEYVAL) 2008-2009-ci illərdə Azərbaycanda qanunvericilik sahəsində həyata keçirilən islahatları yüksək qiymətləndirir. Bu barədə cümə axşamı Bakıda komitənin icraçı katibi Con Rinqqut deyib. O, Bakıda keçirilən "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində I Bakı Regional Konfransı"nın işində iştirak edir.
Rinqqutun fikrincə, 2009-cu ilin fevralında Azərbaycanın qəbul etdiyi "Cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə haqqında" qanunda MONEYVAL-ın bütün tövsiyələri öz əksini tapıb.
"Hazırda Azərbaycan bütünlüklə beynəlxalq tələblərə cavab verən qabaqlayıcı qanuna malikdir və indi onun effektiv yerinə yetirilməsinə nəzarət etmək lazımdır. 2009-cu ildə Azərbaycan əhəmiyyətli proses göstərib və ümid edirik ki, gələcəkdə bu tendensiya davam etdiriləcək", - MONEYVAL-ın icraçı katibi deyib.
Onun sözlərinə görə, qanun qəbul edildikdən sonra hər bir ölkə onun effektiv tətbiqinə səy göstərir, buna görə Azərbaycan Mərkəzi Bankı yanında Maliyyə Monitorinqi Xidməti daima məlumatın alınması və emalı prosesini təkmilləşdirməlidir.
"Cinayət qanunvericiliyinin pozulması aşkar edildikdə, həmin şəxsi cinayət məsuliyyətinə cəlb etmək lazımdır", - Rinqqut bildirib.
2009-cu il fevralın 24-də Azərbaycan Prezidenti İlham Əliyev fevralın 10-da Parlamentin qəbul etdiyi "Cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə haqqında" qanun layihəsini imzalayıb və onun həyata keçirilməsi ilə bağlı fərman verib.
Azərbaycan Prezidenti İlham Əliyevin 16 iyul 2009-cu il tarixli fərmanı ilə Mərkəzi Bank yanında Maliyyə Monitorinqi Xidmətinin əsasnaməsi təsdiq edilib. Bu, "Cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə haqqında" qanunun həyata keçirilməsində əsas nöqtədir.