Azərbaycan, Bakı, 23 fevral /Trend, müxbir N.İsmayılova/
Azərbaycanda qızıl istehsalçısı "Anglo Asian Mining Plc" şirkət 2011-ci il üçün "Qoşa" və "Gədəbəy" yataqlarında, eləcə də digər yataqlarda tədqiqatların genişlənməsinə yönəldilən kəşfiyyat proqramı hazırlayıb. Bu barədə şirkətin çərşənbə günü yaydığı məlumatda deyilir.
Proqram "Qoşa" yatağında 1500 metrlik həcmdə qazmaya, eləcə də "Gədəbəy"də 17500 metr həcmdə qazmanı nəzərdə tutur. "Gədəbəy" yatağında mövcud hədlərin dərinləşdirilməsi məqsədilə 7500 metr qazılacaq, 3000 metr "Çoplan" və 7000 metr "Maarif" yataqlarında qazılacaq.
"Kəşfiyyat stategiyamızın əsas elementidir, çünki biz "Gədəbəy" yatağının uğurlarını təkrarlamağa səy göstəririk. Orada 2010-cu ilin dördüncü rübündə 19555 unsiya qızıl istehsal edilib. "Qoşa" yatağındakı kəşfimiz, eləcə də digər geoloji kəşfiyyat işləri potensialın olmasını təsdiqləyir", - baş direktor Rza Vəziri deyib.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli məhsulun pay bölgüsü sazişi əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə, 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.