Azərbaycan, Bakı, 10 may /Trend, müxbir İ.Xəlilova/
Azərbaycanın iri lizinq şirkəti "Joint Leasing" uzunmüddətli maliyyələşdirmənin cəlb edilməsi məqsədilə ixrac-idxal sxemlərindən istifadə etməyi planlaşdırır. Bu barədə çərşənbə axşamı Trend-ə "Joint Leasing"in baş direktoru Elçin Əhmədov deyib.
"Hazırda Yaponiya və Koreya avadanlığının alınması üçün ixrac-idxal maliyyələşdirilməsi sxemindən istifadə imkanı da var. Biz maraqlı təklifləri Çinin maliyyə institutlarından gözləyirik. Belə ki, bu gün bazarda kifayət qədər Çin texnikası var", - Əhmədov bildiirb.
Onun sözlərinə görə, ixrac-idxal agentliklərinin maliyyələşdirmə şərtləri sadədir və daha uzunmüddətli maliyyələşdirməni cəlb etməyə imkan var. Bu, şirkətə lizinqə vermənin şərtlərini ucuzlaşdırmağa imkan verəcək.
"Ötən il Yaponiya maliyyələşdirməsindən istifadə edilib. Onun çərçivəsində Azərbaycan Beynəlxalq Bankının (ABB) zəmanəti ilə 1,5 il müddətinə 1 milyon dollara yaxın vəsait cəlb edilib. Bu, şirkətmizə lizinq əməliyyatları üçün faiz dərəcəsini 15 faizədək azaltmağa imkan verdi", - Əhmədov qeyd edib. Bu vəsaitlərin sayəsində "Hitachi" texnikası alınıb.
"Birinci halda bizim çox az vaxtımız olub, buna görə də biz ABB vasitəsilə maliyyələşdirməyə getməli olduq. Bizə "uzun pullar" və layihənin həyata keçirilməsi üçün vaxt lazım olduğu halda, ixrac-idxal maliyyələşdirməsindən birbaşa istifadə üçün daha çox imkan olacaq", - Əhmədov qeyd edib.
"Joint Leasing"in səhmdarının Azərbaycanın ən iri banklarından biri - ABB-nin olmasını nəzərə alaraq, bu halda onun köməyi də böyük rol oynayır. "Biz imkan daxilində Beynəlxalq Bankın və onun tərəfdaşları - dünyanın digər ölkələrindəki maliyyə institutlarının ixtiyarında olan resurslar vasitəsilə özümüz də bank vasitəsilə mövcud imkandan istifadə etməyə çalışırıq", - o qeyd edib.
"Şirkət 3-5 ilə vəsaitlərin cəlb edilməsinə ehtiyac olduğunu hiss edir, lakin reallıqda bu gün azı 3 ilə vəsaitləri cəlb etmək mümkündür. Belə ki, maliyyə institutları vəsaitləri 5 il müddətinə verməyə hələ hazır deyillər", - Əhmədov vurğulayıb.
Hazırda lizinqin maliyyələşdirilməsi üzrə orta faiz dərəcələri "Joint Leasing" tərəfindən 20 faizdən 30 faizədək avans ödənişlə və 3 il müddətinədək 19-20 faiz müəyyənləşdirilib. Ötən il faiz dərəcələri orta hesabla 21-22 faiz səviyyəsində olub.
"Müştərinin ödəniş qabiliyyətindən və layihənin maraqlılığından asılı olaraq maliyyələşdirilmə məqsədilə daha çevik şərtlərin tətbiqi üçün imkan var. Faiz dərəcələrinin azalması portfeli genişləndirmək məqsədi güdür, həm də konkret ixrac layihələri altında daha ucuz resursların cəlb edilməsi üçün imkanlar yaranıb", - Əhmədov vurğulayıb.
2011-ci il aprelin 1-nə olan vəziyyətə görə, şirkətin lizinq portfeli 29,5 milyon manat təşkil edərək ötən ilin analoji dövrü ilə müqayisədə 1,83 milyon manat artıb.
Şirkət avans nəzərə alınmaqla il ərzində 3,5 milyon manat artımla 42 milyon manat məbləğdə layihələri maliyyələşdirib, cəmi 164 sövdələşmə bağlayıb.
Şirkətin maliyyələşdirdiyi layihələr iqtisadiyyatın tikinti, nəqliyyat, qida və yüngül sənaye, ticarət və xidmətlər kimi sahələrini əhatə edib.
"Joint Leasing Company" 2007-ci il iyunun 14-dən "Azərlizinq" şirkətinin hüquqi varisi kimi fəaliyyət göstərir. Şirkətin təsisçiləri Britaniyanın "Dolphin Leasing" şirkəti (52,3 faiz) və Azərbaycan Beynəlxalq Bankıdır. Hazırda şirkətin nizamnamə kapitalı 700 min manat təşkil edir. "Joint Leasing Company" 1999-cu ildən fəaliyyət göstərən Azərbaycanın ilk lizinq şirkəti - "Azerlizinq" birgə müəssisəsinin bazasında yaradılıb.
Mayın 10-na olan rəsmi məzənnə 0,7911 AZN/USD təşkil edir.
