Azərbaycan, Bakı, 14 may/Trend, müxbir N.İsmayılova//
İqtisadi İnkişaf Nazirliyi yanında Sahibkarlığa Kömək Milli Fondu (SKMF) Bakı şəhərinin və onun qəsəbələrinin sosial-iqtisadi inkişafının təmini məqsədilə ümumi dəyəri 4,5 milyon manat olan 40 layihəni maliyyələşdirib. Bu barədə dünən iqtisadi inkişaf naziri Şahin Mustafayev Azərbaycan Dövlət Televiziyasına müsahibədə bildirib.
"SKMF tərəfindən layihələrin maliyyələşdirilməsinin məqsədi Bakı və onun qəsəbələrində infrastrukturun və biznes mühitin inkişafı, kiçik və orta sahibkarlığın inkişafına dəstəyin göstərilməsidir", - Mustafayev bildirib.
Onun sözlərinə görə, nazirlik artıq həyata keçiriləcək bir sıra layihələri, eləcə də yeni dövlət proqramı çərçivəsində inkişaf etdiriləcək sahələri müəyyənləşdirib.
"2011-2013-cü illərdə Bakı şəhəri və onun qəsəbələrinin sosial-iqtisadi inkişafı üzrə Dövlət Proqramı" Azərbaycan Prezidenti İlham Əliyevin 2011-ci il 4 may tarixli sərəncamı ilə təsdiqlənib.
Nazirin sözlərinə görə, zeytunçuluğun inkişafı və 1500 hektar zeytun bağının əkilməsi, müasir standartlara cavab verən zeytun emalı üzrə kompleksin tikintisi, 100 hektarlıq ərazidə zəfəran təsərrüfatının yaradılması, 100 hektarlıq üzüm bağlarının salınması, müasir istilikxana komplekslərinin tikintisi məqsədilə layihələrin maliyyələşdirilməsi nəzərdə tutulub.
"Biz araşdırma apardıq və hər birinin gündəlik gücü 10 ton olan çörək istehsalı üzrə 15 müəssisənin, ildə 10 min ton quş ətinin istehsalı məqsədilə 5 quşçuluq təsərrüfatının, ildə 100 milyon yumurta istehsalı üzrə 5 quşçuluq fabrikinin, ət kəsimi üzrə müəssisənin yaradılmasının zəruriliyini aşkar etdik", - Mustafayev bildirib.
Onun sözlərinə görə, fond sahibkarların müraciətlərinə də baxacaq və onlara lazımi kömək göstərəcək.
Mayın 14-nə olan rəsmi məzənnə 0,7908 AZN/USD təşkil edir.