Azərbaycan, Bakı, 11 iyul /Trend, müxbir A.Bədəlova/
Azərbaycanda qızıl istehsalçısı "Anglo Asian Mining Plc" şirkəti cari ilin ikinci rübündə özünün əsas kreditoru olan Azərbaycan Beynəlxalq Bankına (ABB) 4 milyon dollar ödəyib. Bu barədə şirkətin rəsmi saytında yerləşdirilən məlumatda deyilir.
Beləliklə, iyunun 30-na olan vəziyyətə görə, şirkətin ABB qarşısında kredit borcu 17 milyon dollar təşkil edir.
"Anglo Asian"ın icraçı direktoru Rza Vəziriyə bir milyon dollar borc da daxil olmaqla, şirkətin ümumi borcu iyunun 30-na 18 milyon dollar təşkil edib. 2010-cu il iyunun 30-da bu rəqəm 42,1 milyon dollar olub.
2011-ci ilin birinci rübü ərzində şirkət özünün əsas kreditoru olan Azərbaycan Beynəlxalq Bankına 8,6 milyon dollar verib.
İyunun əvvəlində Vəzirinin Trend-ə dediyi kimi, şirkət ABB-nin borcunun ödənilməsi üzrə qrafiki əhəmiyyətli dərəcədə qabaqlayır və banka olan borcun 2012-ci ilin əvvəlində ödənilməsi planlaşdırılır. Onun sözlərinə görə, şirkətin icraçı direktora (Vəzirinin özünə) borcu istənilən vaxt ödənilə bilər, çünki bu borc üzrə faiz dərəcəsi aşağıdır, lakin əvvəlcə ABB-yə olan borc ödəniləcək.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli saziş əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.