Azərbaycan, Bakı, 21 oktyabr /Trend, müxbir A.Axundov/
Bakıda Dənizkənarı Milli Park ərazisindəki gəmi təmiri zavodunun sökülməsi ilin sonunadək başa çatacaq. Trend-in məlumatına görə, bu barədə cümə günü jurnalistlərə Dənizkənarı Milli Park İdarəsinin rəis müavini Nazim Məcidov bildirib.
"Sökülmə işləri demək olar ki, başa çatıb, yalnız kiçik sahə qalıb. Bu işlər tam olaraq bir-iki ay ərzində başa çatacaq", - o deyib.
Bir müddət əvvəl Dövlət Xəzər Dəniz Gəmiçiliyinin rəisi Aydın Bəşirov zavodun Əhmədli qəsəbəsinə köçürüləcəyini bildirmişdi.
"Gəmi təmiri zavodunun köçürülməsi üzrə işlər davam edir. Köçürülmə prosesi çərçivəsində işlərin 70 faizi artıq başa çatıb", - o deyib.