...

2012-ci ildə Azərbaycanda ünvanlı sosial yardım alanların sayı 10-15 faiz arta bilər

Biznes və iqtisadiyyat xəbərləri Materials 22 Oktyabr 2011 14:01 (UTC +04:00)

Azərbaycan, Bakı, 22 oktyabr /Trend, müxbir A.Axundov/

Gələn il Azərbaycanda ünvanlı sosial yardım (ÜSY) alanların sayı 10-15 faiz arta bilər. Bu barədə Trend-ə dünən Azərbaycanın əmək və əhalinin sosial müdafiəsi nazirinin müavini İlqar Rəhimov deyib.

"Əgər bizim proqnozlarımıza görə bu ilin yekunlarına əsasən, ÜSY alanların sayı 130-135 min nəfər olarsa, gələn il bu göstərici 140-150 min nəfər səviyyəsinə çatacaq", - Rəhimov deyib.

Nazir müavini 2012-ci ildə ehtiyac meyarının 80 manatı ötəcəyi ehtimalını istisna etməyib.

"Ehtiyac meyarı səviyyəsinin (hazırda 75 manat təşkil edir) artmasi ilə ÜSY alanların sayı artacaq. İl ərzində, həmçinin əməkhaqları, pensiyalar, sosial müavinətlər, yəni əhalinin gəlirləri artır. Bu da yoxsulların sayının göstəricisinə təsir edir. Buna görə də ÜSY alanların sayında kəskin azalma gözlənilmir", - Rəhimov bildirib.

Azərbaycan 2006-cı ildən ÜSY sisteminə keçib. Sosial yardım 75 manatlıq yaşayış minimumu ilə ailənin bir üzvünün gəlirinin həcmi arasındakı fərqlə müəyyən edilir.

2011-ci ildən Azərbaycanda ehtiyac meyarı 15,4 faiz artaraq 75 manat olub.

Oktyabrın 22-nə olan rəsmi məzənnə 0,7869 AZN/USD təşkil edir.

Xəbər lenti

Xəbər lenti