Azərbaycan, Bakı, 14 noyabr /Trend, müxbir N.İsmayılova/
Ümumdünya Ticarət Təşkilatının (ÜTT) Katibliyi və üzv ölkələrin işçi qrupu çoxtərəfli danışıqların IX mərhələsinin keçirilməsi tarixini müəyyən ediblər. Trend-in məlumatına görə, bu barədə bazar ertəsi danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib.
"Çoxtərəfli danışıqların növbəti mərhələsi dekabrın 9-da Cenevrədə keçiriləcək. Orada bütün üzv ölkələrin işçi qrupları iştirak edəcəklər. Azərbaycanın təklifi üzrə üzv ölkələr üçün yeni "Factual Summary" toplu hesabat müzakirə olunacaq", - Məmmədquliyev deyib.
Azərbaycan hökuməti əvvəllər ÜTT-yə üzv olan dövlətlərin suallarına cavablarını Katibliyə təqdim edib. Bunun əsasında Katiblik "Factual Summary" adlı hesabat toplusu hazırlayıb. Sənəd Azərbaycanın ÜTT-yə üzv olması üzrə gördüyü işlər barədə hesabatı əhatə edir.
Sonuncu görüş (çoxtərəfli danışıqların səkkizinci raundu) 2010-cu il oktyabrın 18-də Cenevrə şəhərində keçirilib. Həmin il oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə mal və xidmət məsələləri üzrə ikitərəfli görüşlər keçirilib.
Bu il iyulun 25-29-da Cenevrədə Azərbaycan nümayəndə heyəti Aİ, Ekvador, İsveçrə, Braziliya və Çin ilə danışqılar aparıb. Halbuki ölkə ÜTT-yə üzv olan 12 ölkə ilə danışıqlar prosesindədir.. ABŞ görüşləri çoxtərəfli danışıqlar zamanı keçirmək istəyini bildirib.
Bu gün Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti, Kanada və İsveçrə ilə ikitərəfli danışıqlar aparır.
Azərbaycan danışıqlara 2004-cü ildən başlayıb.
Azərbaycan bugünədək Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalamaya razılıq verib.
Danışıqlar çərçivəsində Azərbaycan milli hüquqi bazanın ÜTT-nin tələblərinə uyğunlaşdırılması, qüvvədə olan ticarət rejiminin təkmilləşdirilməsi üzrə işləri davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır ki, onlardan təxminən 30 sənəd artıq vahid şəklə salınıb və gələn il bu istiqamətdə işlər davam etdiriləcək.
Ötən il ÜTT katibliyi Azərbaycan üzrə işçi qrupunun tərkibini genişləndirib və oraya daha dörd ölkəni - Ukrayna, Braziliya, Ekvador və İsveçrəni daxil edib. Bunun nəticəsində işçi qrupunun üzvlərinin ümumi sayı Aİ-nin 27 ölkəsi də daxil olmaqla, 32-yə çatıb.
ÜTT yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.