Azərbaycan, Bakı, 30 dekabr /Trend, müxbir A.Axundov/
Özəl pensiya fondları Azərbaycanda 2013-cü ildə işə başlaya bilərlər. Trend-in məlumatına görə, bu barədə cümə günü jurnalistlərə Dövlət Sosial Müdafiə Fondunun (DSMF) sədri Səlim Müslümov deyib.
"Sığorta-pensiya sisteminin inkişafı üzrə Dövlət Proqramında özəl pensiya fondlarının işə başlaması 2013-cü ildə nəzərdə tutulub. Buna görə də belə fondlar üçün gələn il qanunvericilik bazası hazırlanmalıdır", - Müslümov qeyd edib.
Onun sözlərinə görə, hazırda bu sahədə digər ölkələrin təcrübəsinin öyrənilməsi prosesi başa çatır.
Fondun nümayəndə heyəti artıq Almaniya, Türkiyə, Polşa, Qazaxıstanda olub. Qazaxıstanda kifayət qədər radikal islahatlar aparılıb. Ölkə Dövlət Pensiya Fondunu 10 il əvvəl ləğv edərək 15-16 özəl fond yaradıb. Böhran dövründə onlar yarım milyard dollar itirdilər, 4 fond iflas həddinə çatdı və onlara ancaq dövlətin dəstəyi kömək oldu. Almaniyada pensiya fondları böhran dövründə özlərinin 40 faiz vəsaitlərini itirdilər.
Azərbaycanda əmək pensiyası iki hissədən - baza və sığorta hissəsindən ibarətdir. Hazırda ölkədə pensiyanın baza hissəi 85 manat təşkil edir.
Dekabrın 30-na olan rəsmi məzənnə 0,7865 AZN/USD təşkil edir.
